Mizoram Mega Job Fair buatsaih dawn

Labour, Employment, Skill Development & Entrepreneurship (LESDE) department chuan May 9-10, 2023-a Mizoram Mega Job Fair an buatsaih tur chungchangah nimin khan Aizawl Press Club-ah thuthar thehdarhtute an kawm a, chhim ṭheuh turin mi tin an sawm.

LESDE director Angela Zothanpuii chuan, LESDE department chuan hnathawktute leh Mizoram ṭhalaite tan kawng hrang hrangin hma an la tih a sawi a, "Hmalakna kal zelah May 9 - 10, 2023 hian Millenium Centre roof top-ah Mizoram Mega Job Fair buatsaih a ni dawn. Ram chhung leh pawna sector hrang hrang aṭangin company lian leh changtlung tak takte sawm niin, Mizorama hna zawnglaite tan hnathawh tur an rawn chhawpchhuak dawn a ni," a ti.

Job fair-a tel tur company-te chu uluk taka thlan an nih thu sawiin Director chuan, "Tehna fung mumal tak hman a ni a, company rintlak dan te, an theihna te leh an changtlun dan bakah, an registration chungchang thlengin mumal taka enfiah vek an ni," a ti bawk.

LESDE HOTUTE TARLAN ṬHENKHAT

▶ Job fair-ah hian ram pawn leh ram chhunga company hrang hrang uluk taka enfiah leh rintlakte an tel dawn.

▶ Financial institutions, banking, healthcare, services, automobile, IT, FMCG, tourism & hospitality, beauty & wellness etc.-ah te hna chhawp chhuah a ni ang.

▶ Hna zawngtu, thiam bik nei leh nei lote tan pawh a chhawrtu turte duhzawng mi an nih chuan hna an hmu thei dawn.

▶ Company-te hian stall hranpa an nei ṭheuh dawn a, chutah chuan hna zawngtute'n an qualification leh an tuina milin stall-te hi an dawr thei ang.

▶ Company leh hna zawngtute hi an inhmuhrem theih chuan a hmun vêka hian hna pek nghal theih an ni.