Lo hal leh vah thlakna tur ṭha zawk ngaihtuah a ngai - R Lalzirliana

Minister R Lalzirliana chuan nimin khan ATI Auditorium-ah Mizoram pum huapa Rise and Shine, Samagra Shiksha leh School Education department-te buatsaih Science Hackathon kharna a hmanpui. Minister chuan, "Mizoramah lo vah leh hal kan la kalpui reng avangin kan ramngawte a chereu zel a, a thlakna tur ṭha zawk ngaihtuah a ngai," a ti.

R Lalzirliana chuan, khaw­tlang nun hmasawnna atana pawimawh bulpui chu zirna a nih thu a sawi a, "Ram leh hnam hmasawnna turin field hrang hrangah mithiam bik kan neih a ngai a, chutiang mithiam chher chhuak tur chuan zirna kan mamawh a ni," a ti.

Science Hackathon-ah zirlai naupangten environment humhalhna lam leh pipute lo neih dan bansana, tunlai lo neih dan ṭha zawk kalpui a ṭulzia an sawite chu a ngaih pawimawh thu sawiin Minister chuan, "Vei chhunzawm zel ang che u. Mizoramah chuan lo vah leh hal kan la kalpui reng avangin kan ramngawte a chereu zel a, a thlakna tur ṭha zawk ngaihtuah a ngai," a ti a, hetiang ngaihtuahna châng leh veina châng zirlai naupangten an hria chu lawmawm a tih thu a sawi.

Science Hackathon hi pawl 6 - 10 zirlaite tana buatsaih a ni a; quiz round, live challenge leh final meet up te neih a ni. Zirlai tiṭha zual 10 hnenah Minister chuan lawmman a hlan a; pakhatna chu Govt Mizo High School zirlai Lira Lalrinsangi, class 9 niin Rs 10,000 a dawng. Pahnihna Govt Chhinga Veng Middle School zirlai Lalrinzuali, class 8 chuan Rs 7,000 leh pathumna Govt Mizo High School zirlai Lalhmangaihzuala, class 10 in Rs 5,000 an dawng bawk.