Hna lak tur cancel chungchangah MSU-in MSSSB Chairman an kâwm
MSU hruaitute chuan nimin khan Mizoram Subordinate Services Selection Board (MSSSB) hnuaia Common Recruitment Examination kalpui tur LRS department-a surveyor post 15 lak tur cancel a nih leh tur thu leh, SWTA department hnuaia circle officer post 36 lak tur co-terminus basis a nih tur chungchangah MSSSB chairman C Lalhuliana chu a pisa-ah an kawm.
MSU thuchhuah tarlan danin, MSSSB Chairman chuan DPAR (GSW) aṭanga April 25, 2023 a thu an hmuh angin Land Revenue & Settlement dept. hnuaia surveyor post 15 lak tur chu department aṭanga technical paper an buatsaih loh avanga cancel leh a nih thu a sawi a, "Department aṭanga technical paper buatsaih a nih hunah he surveyor post 15 cancel hi lak tura tih a ni ang," a ti.
Social Welfare dept. hnuaia circle officer post 36 lak tur May 2, 2023-a an thuchhuaha co-terminus basis a nih leh tur thuchhuah an siam chungchanga MSU zawhna chhangin MSSSB Chairman chuan, department aṭangin co terminus basis a nih tur thu hriattir an nih rualin, eng huna tawp tur nge a nih tih an dawn tel loh avangin advertisement-ah co terminus basis a nih tur thu an ziah lan loh thu leh an tihsual an pawm thu MSU hruaitute a hrilh.
C Lalhuliana chuan tunhnaia common recruitment examination tura surveyor leh circle officer hna chauh dil tum emaw, common recruitment examination zinga hna dang dil duh lo an awm a nih chuan application form theh luhna man an sèn chu pêk kîr leh an inhuam thu a sawi.
MSU chuan MSSSB hnuaia common recruitment examniation tura tih sual leh tih danglam a awm chu ṭha lo an tih thu tarlangin, "Zirlai tam tak hna dil turte rilru sukthlek tibuai zawnga department an fimkhur tawk lo leh an che fel tawk lo hi pawi kan ti takzet," an ti a, tun hnu zela thleng nawn tawh lo tura fimkhur turin department leh MSSSB-te an ngen.