Circuit house sakna tur lungphum phum
Minister Dr R Lalthangliana chuan nimin khan a bial chhunga Hnahthial PWD complex-ah circuit house sakna tur lungphum a phum. Circuit House hi SASCI sum cheng nuai 241.84 senga sak tur niin, September 30, 2024-ah sak zawh tura ruahman a ni.
Dr R Lalthangliana chuan, district thar pathumah District Hospital sak thuai a nih tur thu sawiin, "Hnahthiala CMO office sak mek pawh zawh fel ṭep a ni a, kawng hrang hrangin Hnahthial damdawi-in tihchangtlun mek a ni," a ti a, blood bank pawh hman theiha kalpui thuai a beisei thu a sawi.
Covid-19 hri leng leh harsatna hrang hrang karah hmasawnna thawh chhoh zel a nih thu sawiin Minister chuan, "Sorkar awm tawhah Covid-19 hri leng, vawkpul hri, lirnghing, raltlan buaipui ngai leh thil dangte a awm ve lo. District tih puitlin pawh a theih ang angin kalpui zel a ni dawn a, PWD Sub Division Hnahthial hi a upat tawh bakah, district khawpui a nih bawk avangin division-ah hlangkai thuai turin chak takin hmalakna kalpui mek a ni," a ti bawk.