Rualbanlote hamṭhatna sawiho

Kolasib District Level Committee on Disability chu nimin khan bawrhsap John LT Sanga kaihhruaiin DRDO conference hall-ah an ṭhukhawm. Kolasib district tan National Social Assistance Programme hnuaiah ṭanpuina 49 pek theih a nih laiin, diltu mi 127 an awm tawh tih tarlan a ni.

Ṭhutkhawmnaah hian ‘Rights of Persons with Disability Act 2016’ zulzuia hmalak tawh dan leh hmalak chhunzawm dan turte rêl a ni a; Social Welfare & Tribal Affairs hnuaia National Social Assistance Programme kaltlanga ṭanpuina pek chhuah theih zat Kolasib district tan 49 chiah bituk a nih laiin, dilna 127 a luh tawh thu tarlan a ni.

Sorkar pisa, damdawi-in, biak-in leh sikul hnenah pianphunga rualbanlote tan chuànkài a awlsam zawk nan kàilàwn leh bán vawn siam ngai pawimawh tura ngen te, hna lâk dawna rualbanlote tana 5% hauh sak chungchang te, enkawlna bik mamawhte tana chhawmdawlna dil leh sorkar laipui scheme hrang hrang kaltlanga hamṭhatna an dawn theih dan turte sawiho a ni.

Hna leh hamṭhatna hrang hrang an dilna kawnga lehkha pawimawh ngaite chu District Hospital aṭangin dil theih a nih thu an sawi bawk.