MLA-in library week a hmanpui

Govt. Aizawl North College chuan nimin khan an college-ah lirbary week an hmang a, Aizawl North-II bialtu MLA Dr Vanlalthlana'n a hman pui.

Dr Vanlalthlana chuan college zirlaite'n library an hmang ṭangkai tur a nih thu sawiin, "Zirtirtute pawhin kan library hi hman ṭangkai theih tura kan buatsaih a pawimawh a ni," a ti a, library week hmangtu zirtirtute leh zirlaite chu lehkhabu chhiar tam kawngah hmasawn tum turin a chah.

Lehkhabu hian power a neih thu sawiin Dr Vanlalthlana chuan, "Chu power chu hmang ṭangkai thei tur khawpa kan chhiar tam a ngai. Kan suangtuahna a taka chantir thei tur khawpa lehkhabu chhiar tam tura ṭan kan lak a pawimawh tak zet a ni," a ti.

Dr Vanlalthlana hian Govt. Aizawl North College tan hian MLA fund aṭangin library-a dah tur lehkhabu eng emaw zat a lo lei sak tawh a, college library tana insen zel a in huam thu leh tihhmasawn zel a tum thu thawktute a hrilh.

Govt. Aizawl North College buatsaih library week hi vawiinah chhunzawm tur a ni a, thupui atan 'Library Service in Knowledge Society' tih hman a ni. Week hman chhung hian thupui hrang hrang thlante hmangin mi thiam tak takten thuchah an sawiin, an la sawi dawn.