Minister Ruatkima'n training a hawng

Rural Development (RD) minister Lalruatkima chuan nimin khan RD conference hall-ah 'Sensitization Training on Government Accounting and Office Procedure’ a hawng. Training hi vawiinah chhunzawma khar a ni ang.

Lalruatkima chuan, office kalphung leh Integrated Financial Management and Information System (IFMIS) chungchang training buatsaih a ni chu lawmawm a tih thu a sawi a, "Sorkar hnathawk hlawh leh bill zawng zawng IFMIS kaltlanga pek chhuah a nih tawh avangin training hi a pawimawh hle. Khawvel changkang zelah thiamna pawh a sang chho zel a, computer hmangin engkim tih a nih tawh avangin thawktute pawh inzirthar a, intahhriam reng a ngai a ni," a ti.

Awlsam zawka hnathawh a nih theih nan thawktute an in her rem ve zel a ngai tih sawiin Minister chuan, "Rilru leh taksa chhawr thiam a pawimawh a, a bikin RD department chu sum che vel a tam hle a, tihsual palh laka inven leh chak zawka hmalak nan sorkarin IFMIS a chhawpchhuak hi a ṭangkai lehzual dawn a ni," a ti a, training chuan rah ṭha a chhuah ngei a beisei thu a sawi.