Dengue chungchang inzirtirna buatsaih; Kuminah dengue vei mi 143 hmuh a ni tawh

State Vector Borne Disease Control Programme (SVBDCP) chuan nimin khan Dengue chungchang inzirtirna hun Chanmari YMA Hall, Aizawlah an buatsaiha, kuminah Mizoramah dengue vei mi 143 hmuh chhuah an nih tawh thu tarlan a ni.

Kalkhawmte lawmna thu sawitu Health director Dr Vanlalsawma chuan, dengue laka inveng turin khawtlang, kohhran leh pawl hrang hrangte nena thawhho ṭhat a ṭulzia sawiin, "Natna do hi Health department hna a ni a, natna tuartu erawh chu mipuite kan ni. Chuvangin natna do kawngah kan ṭanrual a, kan thawhho a ṭul hle," a ti.

SVBDCP-a thawktute chuan dengue natna nihphung te, natna enkawl dante leh dengue vei lo tura inven dan kawng hrang hrangte kalkhawmte an zirtira, sawihona hun hman nghal a ni.

SVBDCP tarlan danin, dengue hi India ram hmun hrang hrangah a hluar hle a, Mizoramah pawh kum tin he natna vei hi pung chho zelin, nunna chânte pawh an awm tawh.

Kum 2021-ah dengue vei hmuh chhuah zat chu 83 niin, kum 2022-ah dengue vei zat hi pung chho in, mi 1,868-in an vei a, mi pangain nunna an chân.

Kuminah (April 19 thleng) sample lak 1,247 aṭangin dengue vei mi 142 hmuh an ni tawh a ni.

Dengue natna hi mi tam takin an la hmelhriat loh natna a ni a; khawvel lo changkang chho zel ina a ken tel, mipui zin veivak pung leh ram leh ram intlawhpawhna ṭhate avang hian Mizoramah dengue natna vei an pung chho ve zel niin an tarlang bawk.