Manipur-a Zohnahthlakte'n an harsatna tawh avangin CM-in Union Home Minister leh Manipur CM a bia; Mizorama Meitei-te thlamuang taka awm tura ngen an ni

Manipur-a buaina chhuak avanga Zohnahthlakten har­satna an tawh chungchangah chief minister Zoramthanga chuan Union Home minister Amit Shah leh Manipur chief minister N Biren Singh-te lehkha a thawn bakah telephone hmang­in a bia. Mizoram Home department chuan thuchhuah siamin, Mizorama cheng Meitei-te thlamuang taka awm turin an ngen.

Chief Minister hian nimin zing khan Union Home Minister nen rei tak an inbiak thu tarlangin, "Pawisawilo leh nunau tam takten harsatna an tawk hi pawi kan ti tak zet a; theihtawpa remna leh muanna a awm theihna turin Central Armed Police Forces-te pawh dah belh a tum thu min rawn hrilh," a ti.

Manipur CM nen an inbiak chungchangah Zoramthanga chuan, "Manipur dinhmun leh an buaina chungchang chinfel a nih theih dan tur chungchangte kan sawi dun a ni," a ti a, Manipur CM hian hmarchhak CM-te zinga upa ber chan chang a nih ve avangin remna a awm theihna tura hma la tur pawha a beisei thu a tarlang.

Chief Minister chuan N Biren Singh nen an inbiakna hian rah ṭha a chhuah ngei a beisei thu tarlangin, "Pawisawilo leh nunaute him taka an awm theihna turin joint press statement siam kan tum," a ti.

Mizoram sorkarin he buaina hi a enliam mai mai dawn lo tih tarlangin Chief Minister chuan, Home Minister leh Home Commissioner kaihhruaina hnuaiah eng dinhmun pawh thleng se, Mizoram mite himna tura hma an lak dan turte lo inenlawkna meeting nei turin a hriattir tawh niin a tarlang.

Central YMA hruaitute chuan Manipur-a Zohnahthlakten harsatna an tawh chungchangah hian nimin zing khan Chief Minister hi an kawm a, Zofate leh India hmarchhak mipuite tan remna leh muanna a awm theih nan theihtawp chhuah zel an rêl.

Hetihlai hian Home depart­ment chuan thuchhuah siamin, Manipur-a tualchhung buaina awm mek chu Mizoram sorkarin pawi a ti hle tih an tarlang a, "He buaina avanga Manipur chhunga Zohnahthlakte tawrhna pawh Mizoram sorkarin a hria. He buaina avanga harsatna tawk mek Zohnahthlakte himna turin Mizoram sorkar chuan theih­tawpin hma a la nghal," an ti.

Manipur buaina hi a reh thuai Mizoram sorkar chuan a beisei tih tarlangin Home dept. chuan, "He buaina avanga harsatna tawk Zohnahthlakte a hre reng a ni," a ti a, Mizo mipuite chu he buaina tipunlun zawnga hmalakna awm reng reng dodal turin an ngen nghal.

Home dept. chuan Mizorama cheng Meiteite thlamuang taka awm tur leh buaina hi a hma thei ang bera tih reh a nih theih nan anmahni zâwna hma la turin an ngen a, Mizoram sorkar chuan Mizoram chhunga Meitei awmte himna a ngaihtuahin, hma a la a ni tih hre tur leh ring tawk turin an chah bawk.

Manipur-a Meitei hnam scheduled tribe (ST) caterogy-a dah tum duh lohna lantir a, tribal pawl hrang hrangin April 3, Nilainia 'Tribal Solidarity March' an buatsaihah tribal leh non tribal inkarah buaina a chhuak a, a punlun chho zel a ni.

Buaina chhuak avang hian chenna in eng emaw zat hal a ni tawh a, hliam tuar pawh ṭhahnem tak an awm tawh. Chenna in kâng leh hliam tuar zingah hian Zohnahthlak eng emaw zat an tel.

Tun ṭuma buaina a chhuah hma hian tribal-te chenna chu reserved forest area tiin Manipur sorkar chuan mi tam tak a hnawt chhuak a, chung zingah chuan Zohnahthlak eng emaw zat an tel. Heivang hian Churachandpur-ah pawh nawrh huaihawt a lo ni tawh.