Manipur buaina chingfel turin ngen

Rajya Sabja MP K Vanlalvena chuan nimin khan Union Home minister Amit Shah leh Union Home secretary Ajay Kumar Bhalla hnenah Manipur-a buaina thleng mek chingfel tura ngenna a thlen.

K Vanlalvena hian Union Home Minister leh Secretary-te hi lehkha­thawnin, Manipur-a Zohnahthlak hnam hrang hrangten kum tam tak kal tawh aṭanga an luah ram chu Manipur sorkarin forest reserved atana a puan thar avanga heng buaina hi thleng a nih thu a tarlang.

Manipur sorkar hmalakna hi central sorkarin a tih tawp thuai a ṭul thu leh tihtawp a nih loh chuan North East state hrang hrangah he buaina hi a kângkai thei tih Rajya Sabha MP hian a thlen.

K Vanlalvena chuan, Mizorama state dang aṭanga lehkhazir leh hnathawka awm mek, Meitei-te tiamin thlamuang taka an chên theih laiin, Mizo hnahthlak hnam hrang hrangte chu Manipur state chhungah thlaphâng takin an awm mek tih tarlangin, "Heihi titawp turin central sorkar a rang thei ang bera a inrawlh a ṭul," a ti.