KHAWTHLIR

Power supply awm dawn lo

Power & Electricity dept. chuan hriattirna ti chhuakin naktuk (6.5.2023) hian Lungmual Sub Station-ah hna thawh a nih dawn avangin zing dar 9 aṭanga chawhnu dar 1 chhung Luangmual, Chawlhhmun, Chawnpui Veng ṭhenkhat, Zotlang, Zonuam, Tuivamit, Tanhril, Central Jail, Sakawrtuichhun, Phunchawng, Rangvamual, Ainawn Veng, Edenthar, Hunthar Veng ṭhenkhat, Chanmari West, Bawngkawn Chhim Veng, Chaltlang Lily Veng leh Dawrpui Vengthar ṭhenkhatte'n power supply an dawng dawn lo tih an tarlang.

Home Secretary-in NGO-te a kawm

Home secretary H Lalengmawia chuan nimin khan a pisaah Home department hotu te, Central YMA, MUP, MZP leh All Mizoram Manipuri Association (AMMA) hruaitute a kawm a; Manipur-ah remna leh muanna a awm theih nan leh Zofate himna tur leh Mizorama Meitei-te him nan Mizoram sorkarin hma a lak thu a sawi a, Meitei te chu Mizoramah thlamuang taka awm turin a hrilh.

Ngur khuaah  ASF hri leng

Champhai district-a Ngur khua chu vawkpûl hri, African Swine Fever (ASF) lenna hmun (infected area)-ah puan a nih thu Champhai District Magistrate in a tarlang a; Ngur khua aṭangin vawk lak chhuah/ lakluh phal a ni lo a, vawk thi chu thuk takah chinai nen phum tur a ni. Vawk talh leh a sa zawrh khap a ni bawk.

Form thehluh theih

Higher & Technical Education department chuan JEE, 2023 results hmanga Mizoram quota-a engineering course hrang hrang dil duhte chu May 31, 2023 thleng Technical Wing Office, Higher & Technical Education, Chaltlang, Lily Vengah form siamsa hmangin JEE, 2023 Score Card leh ṭul dangte thehlut turin a hriattir.

Kuhva rah man

Serchhipa hmunpui nei Assam Rifles sipaite chuan April 3, 2023 khan Zokhawtharah truck pahnih phurh kuhva rah, Myanmar aṭanga dan loa lak luh nia hriat ip 240 an man. Kuhva phurtute chu Lalkima (25) Tlangsam leh F Vanlalhmunsiama, Tlangsam te an ni.