Sorkar kum kal mekah Mizoramin cheng vbc. 600 a hmu thei dawn - DoNER Secretary

DoNER secretary Lok Ranjan hoin May 3, Nilaini khan Aijal Club-ah Mizoram sorkar hotute nen DoNER Ministry hnuaia hnathawh mekte thlirhona leh zirchianna neih a ni a, sorkar laipuiin DoNER Fund a tihpun dawn avangin sorkar kum kal mekah Mizoram chuan cheng vbc. 600 vel a hmu thei dawn niin a sawi.

Lok Ranjan chuan Mizoramin DoNER hnuaia project a kalpui hrang hrangte chuan hmasawnna rah ṭha a chhuah a beisei tih a sawi a, "State hmalakna chu a ṭha thawkhat hle," a ti a, Mizoramin DoNER project a kalpuinaah harsatna a neih ang angte chu a rang lama chingfel turin hmalak a inhuam thu a sawi.

DoNER hnuaia project tam zawk chu hmasawnna ruhrel (infrastructure) atan hman a nih thu leh mipui vantlangin chan tam zawk an neih theih nan social sector leh eizawnna (economy) chu ngaihpawimawh mek a nih thu sawiin DoNER Secretary chuan, "Sorkar laipuiin DoNER fund a ti pung dawn a, Mizoram pawhin DoNER aṭanga sum a hmuh ṭhin let thum a hmu thei tawh dawn. Sorkar kum kal mekah Mizoram chuan cheng vbc 600 vel a hmu thei dawn a ni," a ti a, social sector leh eizawnna lamah ngaihtuahna seng thar turin kalkhawmte a chah.

Lok Ranjan chuan DoNER aṭanga sum hmuhnaah tun hmaa advance pek chu a awm thei tawh dawn lo tih sawiin, "Bill siamfela utilization certificate (UC) thehluh a nih hnuah chauh sum hi pek chhuah a ni tawh dawn a, DoNER aṭanga sum hmu ṭha tur chuan state tinte ṭanlak thar a ngai. DoNER Ministry hian hmasawnna tur atana project khawih theih chin a nei a, zau zawka hmasawnna Mizorama a awm theih nan Central Ministry hrang hrangte dawr thiam ang che u," a ti.

He hunah hian chief secretary Dr Renu Sharma, Planning secretary Lalmalsawma Pachuau leh sorkar hotu dangte an tel a; DoNER Secretary hi DoNER Joint Secretary, Deputy Secretary leh Senior Consultant-ten an ṭawiawm a ni.

ṬHUTKHAWMA TARLAN ṬHENKHAT

▶ DoNER Ministry hnuaiah Mizoramah project 28 kalpui mek.

▶ Non Lapsable Central Pool of Resources (NLCPR)-ah project paruk.

▶ North East Special Infrastructure Development Scheme (NESIDS)-ah project 17.

▶ Prime Minister Development Initiative in North East Region (PM-DevINE)-ah project pahnih.

▶ North East Road Sector Development Scheme (NERSDS)-ah project pathum.

▶ Project-te hi PWD, Health & Family Welfare, PHE, Power & Electricity, Tourism, DCMA, UDPA kaltlanga thawh mek a ni.

▶ North East Council (NEC) hnuaiah Mizoramah project 46 kalpui mek a ni.