Mizoram leh Assam minister an inkawm
High Powered Review Board of Brahmaputra Board meeting, Guwahati-a neih zawh taka Mizoram aiawha kal Agriculture minister C Lalrinsanga chuan May 2, 2023 khan Assam Agriculture minister Atul Bora chu a chenna-inah a kawm. C Lalrinsanga chuan, state pahnih ramri chinfel kawngah Assam sorkar chu inhawng leh zual tura a duh thu a sawi.
Sorkar thuchhuah tarlan danin, minister pahnih inkawmnaah hian ramri chungchangah C Lalrinsanga chuan, state aiawha hmalatuten an hmalak mek kal zelah inremna ṭha tak an neih ngei theih a duh thu leh Assam state pawh inhawng leh zual tura a duh thu a thlen.
C Lalrinsanga chuan, hmarchhak state-te inpawh leh ṭanrual a ngaih pawimawh thu a sawi a, "Agriculture lamah pawh thawhhona ṭha zawk kan neih zel ka beisei," a ti.
State pahnih Agriculture Minister-te hian Kharif season lo awm turah Assam-a buh chi ṭha leh hlawk zawk - black rice leh thlai chi dangte pawh Mizorama thar chhuah a nih theih nana hmalak dan turte an sawi dun bawk.