Martarte hriatrengna lungphun hawn a ni; Sorkarin martar chhungte a ngaihtuah - HM

Home minister Lalchamliana chuan nimin khan Keiṭum khuaah martarte hriatrengna lungphun leh VC House (Panchayat Bhavan) a hawng. Home Minister chuan sorkarin martar chhungte chu a ngaihtuah thu sawiin, Covid-19 vanga an beisei ang sum an hmuh theih loh avangin hma an lak chak theih loh thu leh martar chhungkuate'n lo hrethiama nghak hram hram turin a ngen.

Lalchamliana chuan, martarte hi tunhma aṭangin theihtawpa an ngaihsak thu a sawi a, "An pual thlanmual pawh siam niin chutah chuan mi 1,563 kan dah tawh a, a ṭul angin kan thuam ṭha chho zel dawn. Tun kan han sorkar leh hian kan Chief Minister-in a ngaipawimawh em em a, kan sorkar tirh phat khan martarte leh an chhungkuate ngaihtuahtu tur bik committee thunei tak kan din nghal," a ti.

Covid-19 vangin harsatna tawhzui a nih thu sawiin Home Minister chuan, "State sorkarten kan beisei angin sum leh pai kan hmu thei ta lo a, kan tum ang takin hma kan la zui thei ta rih lo a ni," a ti a, martar chhungkuate'n chu lo hrethiama, lo nghak hram hram turin a ngen.

Home Minister chuan eng vanga martar nge tih leh zalenna an sual chhan sawifiahin, "Kan hriat angin Mizote hi tu hnuaiah mah kan kun ngai lo a, mahnia ro inrelin zalenin kan awm ṭhin, chu chu kan pianpui a ni. British sorkar nen kan indoa, kan hneh ta loa min awp zui a ni," a ti.

Lalchamliana chuan Bristish-in India ram an chhuahsan dawn khan hmana an zalenna leh hnam hran daih an nihna ngaihthahin ram pathum India, Pakistan leh Burma-ah min phel darh tih sawiin, "He dinhmun duhawm lo tak ata hi tal chhuah a, Zohnahthlak unaute rorelna pakhat hnuaia zalena awm kha kan sualin kan bei ta a ni," a ti a, chu zalenna atan chuan an ṭhiante an martar thu leh anmahni nawm nan an nun an hlan loh thu a sawi.

Martar lung an phunsakte hi Lalchawia, Ralliana leh Lalvena te an ni. VC House hi Rs 10,00,000 senga sak a ni a; tlai lamah khawtlang huapin ruai an ṭheh a ni.