Manipur-a buaina chungchangah MZP-in Chief Minister an hmu

MZP hruaitute chuan Manipur-a chi leh chi kara buaina chhuaka Zohnahthlakte'n harsatna an tawh chungchangah nimin tlai khan chief minister Zoramthanga a pisa-ah an kawm a, Imphal-a Mizo zirlaite thiar chhuah ṭul an tih thu an thlen.

MZP hruaitute chuan Imphal-a Mizo zirlaite an sahimna atan lak chhuah Chief Minister hi an ngen a, Zoramthanga chuan Imphal-a Mizo zirlaite chu thlawhtheihna hmanga thiar chhuah a ṭul a nih chuan Mizoram sorkar a inhuam thu leh hmalak nghal a nih thu a sawi.

MZP chuan thuchhuah siamin, Imphal-a Zofate chhuah phalsak an nih loh thu tarlangin, "MZP chuan hriatthiam har a ti hle. Mizoram CM leh Rajya Sabha MP-ten chak taka India sorkar leh Manipur sorkara thuneitute rang taka bia a, kil hrang hrang aṭanga hma an la nghal hi lawmawm kan ti hle," an ti.

Manipur-a buaina chhuak hi mi ṭhenkhatin MZP-in Zofate thlavang hauhna thu a chhuah avang anga an thehdarh thu tarlangin MZP chuan, "Zofate tihphel tumna leh thiam loh chantir tumnaah MZP chuan a ngai a ni. MZP-in thuchhuah a siam avanga buai an ni lo," an ti a, an buai avanga thuchhuah siam an nih zawk thu an tarlang.

MZP tarlan danin, buaina chhuah chhan hi Manipur sorkarin, Manipur-a Zohnahthlakten kum za tam tak an lo luah tawh ram reserved forest area-ah puang a, nasa taka a nawr chep mek vang a ni.

Manipur sorkar thil tih dan hi kan unauten duh loin hma an la ta a ni. Kan unaute nawr chepa an awm laiin MZP chuan an thlavang a hauh a, Zofate nekchepa an awm avanga an dikna chanvo chang tura hma an laknaah MZP chuan a thlawp thu a sawi a ni.

Khawvel hmun hrang hranga Zofate ten harsatna an tawh an thlavang hauhna a lo nei tawh ṭhin tih tarlangin MZP chuan, "An thlavang hauhna pawh kan nei zel bawk ang. Hetiang buaina a chhuah châng hian, Mizoram chhunga hnam dang chengten harsatna an tawh palh theih thil thuah, MZP chuan mawh a phurh loh tur thu kan lo sawi tawh ṭhin," an ti.