CADC hmasawnna turin BJP lo an awm lo - Mizoram BJP President

Chakma Autonomous District Council (CADC) inthlan lo awm tur atana campaign-a feh chhuak Mizoram BJP president Vanlalhmuaka chuan CADC hmasawnna turin BJP lo chu an awm lo niin a sawi.

Vanlalhmuaka chuan MNF-in double engine pawimawhzia an sawi fo nia sawiin, "Double engine an sawiah erawh oil a awm loh avangin a nung thei lo, hmasawnna pawh kan hmu thei lo a ni. CADC huamchhunga kawng chhe lutuk hi a entirna pakhat a ni. BJP chuan triple engine kan pe ang che u tih hi ka sawi duh. Central-ah kan sorkar mek a, CADC-ah kan sorkar anga, MLA election-ah sorkarna kan siam bawk anga, chumi hunah chuan triple engine tak tak chu a awm thei dawn," a ti.

MNF chu Mizoram hmun dangah pawh hnawl mek party an ni tawh nia sawiin MBJP President chuan, "A chhan chu an intiamna an tih hlawhtlin ngai loh vang a ni. Kumin CADC election lo awm turah pawh CADC mipuite hian MNF party kan hnawl tawh ngei ka ring a ni," a ti a, Mizorama sorkarna chelh mek MNF party kalphungah chuan 'kan ti ang an tih hi kan ti dawn lo' an tihna a nih thu a sawi.

Vanlalhmuaka chuan Congress pawh central-ah an tluchhe tawh a, Mizoramah phei chuan awmna chi a ni tawh lo tih a chian thu sawiin, " ZPM party lahin Chakma tel loin sorkarna kan siam thei tiin minority-te hmusit takin an sawi a, nimahsela tun hnaiah minorities awmna khua; constituency-te an rawn hmangaih thar leh thut ta hi 'Kalphung Thar' an tih ang hi a nih mai hmel," a ti.