Ram hmasawnna atana rilru leh thâ seng turin MNF sorkar ngen
ZPM ṭhalai chuan, MNF kaihhruai sorkarin kawng chhawng siam nan leh Rs 3,00,000 sem nan thla riat vel hun an la nei tih tarlangin, MNF-te chu opposition party ang maia khawsa lo a, ram hmasawnna tura an rilru leh thâte sêng zawk turin an ngen.
ZPM ṭhalaite thuchhuah chuan, MNF party-in mipuia an intiamna - Aizawl khawpui traffic jam awm lohnaa siam tura kawng chhawng siam te, SEDP-a Rs 3,00,000 sem te, ei leh bara intodelh leh an intiamna hrang hrang tihlawhtling turin thla riat vel chauh hun an nei tawh tih tarlangin, "Kan ram hmasawnna tura rorelna pek an ni tih inhre lo a, opposition party ang zawka khawsa loin, kan ram hmasawnna turin an rilru leh thâte sêng zawk turin kan ngen a ni," a ti.
MNF party chu mipui tana rorel tura thlan an nih inhre loin, mipui beisei buaipui loin eptu party leh eptu MLA-te beih chu hna pui berah an ngai nia an hriat thu ZPM ṭhalaite chuan an tarlang a; Covid-19 dona atana kohhran, NGO leh mimalin pawisa an thawh khawm chu 'A beitham lutuk' tih khumah sorkar hotute an puh.
ZPM Ṭhalai chuan, ZPM chief ministerial candidate Lalduhoma'n a bial leh Mizoram mipui tana a hmathlir tihlawhtling turin kumin kum tawp lama inthlanah ZPM sorkar a pian ringin mipuiin beiseina sang tak an nei niin an tarlang bawk.