He rama cheng mipuite hi mi taima ram kan dinsak dawn a ni - MPCC President

Chakma Autonomus District Council (CADC) inthlan lo awm tur atan Congress party chuan nimin khan Borapansuri-II ah vantlang inkhawm an buatsaih a, he hunah hian MPCC president Lalsawta chuan mi taima ram an din dawn thu a sawi.

Lalsawta chuan Chakma mipuite, Mizoram hmun tinah mirethei tam tak an awm tih sawiin, "Keimahni tan hian kan din chhuah theihna turin ṭang puihna kan pe dawn che u. Hna hrang hrang thawkte cheng nuai hnih aia tlem loin kan pui dawn a ni. He rama cheng mipuite hi mi taima ram kan din sak dawn," a ti.

Mizoram chhunga hnam tin tana ding ṭhin leh ding reng chu Congress party a nih thu sawiin Lalsawta chuan, "A changa Chakma tel lo sorkar kan din dawn ti a, a changa Chakma kan en hrang lo che u, tia parṭhi awrhtir leh hnuhnawh ang mai mai kan nive lo," a ti a, ZPM chu sorkar hma pawha candidate vang leh MLA candidate-ah lamṭang nei tam zawk nih tuma buai an nih thu a sawi.

MPCC President chuan CADC inthlan turah Congress party-ah hmel thar nitin hmuh tur a awm chho zel nia sawiin, "Ṭhalai lehkhathiamten Congress an zawm nasa a, candidate pawh kan nei ṭha ber. CADC-a kan party candidate-te in vote hian in damkhawchhuah nan vote in thlak a ni," a ti.

Mizoram tan, Chakma ram mipuite tan sorkar ṭha kum tawpah an siam dawn nia sawiin Lalsawta chuan, "Congress party-in Mizoram tan sorkar ṭha siam a tum dan leh autonomous district council kalpui a tum dan hi ram leh hnam tan a ṭha a ni," a ti a, an tana vote thlak turin Chakma mipuite a sawm.

Borapansuri-II a vantlang inkhawmah hian West Tuipui bialtu MLA Nihar Kanti Chakma leh Mahila presidet Vanlalawmpuii Chawngthu leh Congress ṭhalai president Dr Lalmalsawmate pawhin thu an sawi.