Aizawla jail pathumah tâng awm thei zat bituk aia tam daih an tâng mek

Mizoram State Legal Services Authority (MSLSA) member secre-tary R Vanlalena chuan nimin khan Aizawl District Jail, Central Jail leh Central Women Jail-te a tlawh. Jail pathumah tâng awm thei zat bituk aia tam daih tâng an awm mek.

Jail tlawh hi Supreme Court-in order a siam tawh leh Gauhati High Court Principal Bench-in Writ Petition (Civil) order a pawm tawh anga neih tihhlawhtlinna a ni.

MSLSA Member Secretary hian jail chhunga tang awm thei zat te, mipa leh hmeichhe tang zatte leh jail tang lai court-in bail an phalsak tawh si, eng emaw harsat-na vanga la chhuak thei lote chungchang a endik.

MSLSA hotute tarlan danin, Aizawl District Jail-ah tang mi 90 awm thei tura ruahman a nih laiin, mipa 143 an awm mek a, chu'ng zinga mi 116 chu thubuai la chinfel loh niin, mi 27 chu thiam loh chantir tawh an ni.

Central Jail chu mi 438 tan theihna tura ruahman a nih laiin mipa 889 an tang mek a, chu'ng zinga mi 601 chu thubuai la chinfel loh niin, thiam loh chantir tawh mi 288 an awm.

Central Jail-a tang zingah April 13, 2023 aṭanga chaw ngheia nuar an awm a, chu'ngte chu mi 18 an ni. R Vanlalena chuan chaw ngheia nuarte chu an thil phutte zawtin, an harsatnate an enpui a; hma laksak theihna awm angah puih a tum thu leh a hmalakna ngaichang tura a ngen bakah, chaw nghei tawh lo turin a ngen.

Central Women Jail chu mi 96 tan theihna tura ruahman a nih laiin, hmeichhia 273 an tang mek a, chu'ng zinga mi 234 chu thubuai ngaihtuah mek an ni a, thiam loh chantir tawh mi 17 an awm. Nute tan vanga naupang tang ve 22 an awm bawk.

Central Jail, Central Women Jail leh Aizawl District Jail-ah tang awm thei tur chin bituk lêt aia tam an awm vek avangin jail-te chu a tawt hle tih MSLSA thuchhuah chuan a tarlang.