Lirthei neitu leh khalhtute'n Rela bungraw lakluh an duh

Bungraw phurtu lirthei pawl hrang hrangte chuan thuchhuah inṭâwm siamin, balu leh leirawhchante chu Mizoramin a neih ve tho avangin Mizoram páwn aṭanga lâk luh rih loh an duh thu leh rel hmanga bungraw lak luh an duh thu an tarlang.

Mizorama bungrua phurtu pawl hrang hrang - Mizoram Truck Owners Asssociation, Mizoram Truck Drivers Asssociation, Mizoram Tipper Association (Drivers & Owners), Ashokleyland Tipper Welfare leh 407 Vehicles Owners Associa­tion hruaitute chu nimin khan Aizawla Mizoram Tipper Association pisaah an inhmu khawm a; joint press release an siam nghal.

An thurelte chu sor­kar­in a tihlawhtling lo a nih chuan a ṭul anga hmalak zel an tum thu an sawi a; an duh dan chu Mizoram mipuite Co­vid-19 hri laka an him tlânna tur a nih avangin mipui thlàwpna an ngen a ni.

1.    Mizoram páwn lam aṭanga essential commodity leh non-essential commodity rawn phur luttu vai driver leh handleman-te Mizoramah zalên takin an teihawi thei a, Covid-19 an lo vei palh a nih chuan Mizote tan nasa takin kaina chance a sang bawk si. Chuvang chuan, kan mamawh essential commodity leh non-essential commodity rawn lut­te hi Bairabi lamah rel hmangin lak luh vek ni se. Loh theih lohna vanga by road-a lo lutte chu ramri chinah transit point siamin transit ṭhin ni rawh se.

2.    Kan ramin kan neih ve balu leh brick-te hi Mizoram páwn aṭanga lâk luh rih loh ni rawh se.

3.    Driver leh handleman-te'n hmai tuamna leh hand sanitiser-te hman ṭangkai ni se. Lirthei tinah hman lai mai bakah, a spare pai ni se, social distance ngaih pawimawh ni rawh se.