Task Group on Quarantine Facilities-in Quarantine-na hmunhma enfiah
Covid-19 chungchanga Task Group on Quarantine Facilities chuan nimin khan an chairman Esther Lalruatkimi, School Education secretary hoin Mizoram páwn aṭanga lo hawte inkhung hranna hmun hrang hrang an tlawh a, harsatna an neih hrang hrangte a enpui.
Task Group on Quarantine Facilities Chairman chuan, "Kohhran ṭhahnem takin sorkar dilna ngai pawimawhin an hmunhmáte hman min phalsak a, a lawmawm tak zet a ni," a ti.
Esther Lalruatkimi chuan, hmun hrang hrang aṭanga lo haw tur an la tam avangin, chu'ngte hre reng chunga task force-te'n ruahmanna an siam zel a pawimawh thu leh DC office remruatna piah lamah mahni véng ṭheuhte a him thei tur ang bera lo inruahman a pawimawh thu a sawi a, "Zin hawte zingah fimkhur tâwk lo leh inkhung hran pawimawhna hre tâwk lo awm palh theih a nih avangin dawhthei taka inenkawl a pawimawh a ni," a ti.
Task Group on Quarantine Facilities-te hian Synod Camping Centre, Sihphir Neihbawih te, ICFAI University te, Mission Veng Kohhran Sunday School Hall, Khatla leh Ramhlun Presbyterian Kohhran hall-te an tlawh a ni.