May 9-a Chakma ADC inthlan tura BJP candidate Amit Kumar thah a ni; a kaihhnawihah MNF candidate an man

May 9, 2023-a Chakma Autonomous District Council (CADC) inthlan awm tura Rengkashya biala BJP candidate Amit Kumar Chakma, MADC chief executive member hlui ni bawk chu May 4, Ningani zan dar 11 vel khan thah a ni. He tualthihna kaihhnawihah hian he biala MNF candidate Prema Ranjan Chakma chu police-in an man.

Vanglaini thu dawn danin, Rengkashya bial chhunga Lokhisury-ah BJP-te chuan May 4 zing khan CADC inthlan tur pualin kawngzawh (rally) an huaihawt a, rally-a tel Lokhisury khuaa la châmbâng ṭhenkhat chuan buaina an tawh thu Amit Kumar Chakma an hrilh avangin May 4 zanah a campaign-na hmun aṭangin Lokhisury hi a pan.

Amit Kumar Chakma leh amah ṭawiawmtute chu Lokhisury VCP ina an awm laiin mi eng emaw zatin kut an thlak a; Amit Kumar hian a lu-ah hliam tuarin, kutthlak a nih aṭanga rei vak loah a thi.

Mi dang paruk an hliam bawk a, hliam zinga mi Lokhi Ram Chakma chu a ngaihtuahawm deuh avangin hmunpui lamah hruai nghal a ni.

Thil thleng chung­changah hian Vaseikai Police Station-ah thubuai ziah luh a ni a, police-te chuan kutthlaktu zinga tel nia puh Rengkashya biala MNF candidate Prema Ranjan Chakma chu manin, thu zawhfiah turin Lawngtlaiah an hruai a ni. Mi dang eng emaw zat pawh thu zawhfiah a ni tawh bawk.

Mi kut tuara thi Amit Kumar Chakma hi Reng­kashya bialah hian ṭum hnih thlan tlin a lo ni tawh a, CADC CEM pawh a lo ni tawh.

He thil thleng avang hian Lawngtlai bawrhsap David Lalthantluanga chuan Chawngte a pan nghal a, boruak muan­awm a awm theihna atan hma a la nghal.

Thu dawn danin, Reng­kashya biala candi­date zingah thi an awm avang hian he bial bikah hi chuan May 9-ah inthlan buatsaih a ni dawn lo a, inthlan hun tur chu State Election Commission-in a ruat ṭha leh dawn a ni.