Mizorama chengte hneh taka châwm zo tur ram hman theih tam tak a la awm - CM
Chief minister Zoramthanga chuan, Mizoramah a chhunga chengte hneh taka châwm zo tur ram hman ṭangkai theih tam tak a la awm thu a sawi.
Planning and Programme Implementation department chuan Ministry of DoNER bultumin May 4, Ningani khan Royale Lalawi Confernce Hall-ah State Investment Workshop an buatsaih a; hun hmanpuitu Chief Minister chuan, Mizoramin hmasawnna turin kawng hrang hrangah theihna a neih thu a sawi.
Zoramthanga chuan, Mizoramah tourism, education, hotel leh hospitality bakah, agriculture lamah investment tih theihna remchang ṭhahnem tak a awm thu a sawi a, "Mizoramah chuan a chhunga chengte hneh taka chawm zo tur ram hman ṭangkai theih tam tak a la awm a, tui leh ruahtui duhthusam, sik leh sa nuam, engkim deuh thaw ṭha taka thar chhuah theihna tur lei ṭhate hi a theihna ang taka ṭangkaia hman theih a nih chuan rah duhawm tak a chhuah thei," a ti a, investor-te tan kawng thui tak a inhawn thu a sawi.
DoNER secretary Lok Ranjan pawhin thu sawiin, Ministry of DoNER chuan Global Investors Summit awm turah hian India hmarchhak state-ah sector hrang hranga sumdawnna leh eizawnna bul ṭanna tur sum leh puihna tam zawk a luh a, hlawkna tam zawk hai chhuah theih a nihzia pholan tum a nih thu a sawi.
Workshop-ah hian chief secretary Dr Renu Sharma pawhin thu a sawi a; Invest India, FICCI leh Mizoram sorkara deparment 14 hotute bakah, investor 13 an tel a ni.