Congress party-in an sorkar chuan Old Pension Scheme hman an tum

Mizoram Pradesh Congress Committee (MPCC) Media Department hruaitute chuan nimin khan Aizawl Press Club-ah thuthar thehdarhtute an kawm a; Congress party-in kumina inthlanpuiah sorkarna an siam chuan sorkar hnathawkte New Pension Scheme (NPS) chu Old Pension Scheme (OPS)-ah an thlak dawn tih an puang.

MPCC Media chairman Dr Lallianchhunga chuan, Mizoram sorkar hnathawk NPS hmangte tan OPS an pek vek dawn thu an lo sawi tawh tih a sawi a, "He thil hi thil tih theih ngei nia kan hriat avangin tuna Mizoram sorkarin sum leh paia harsatna a tawh mek chhâwk zângkhâi nan pawh kalpui ngei ṭulin kan hria. Assembly budget session zawhna leh chhanna aṭanga a lan danin, January 24, 2023 thleng khan NPS hnuaiah sorkar hnathawk mi 9,276 an awm tawh," a ti a, NPS hmangtute pawisa thawh do let nan sorkarin kum 2020-2023 chhungin kum tin cheng nuai 4,000 chuang a seng ziah niin a sawi.

NPS-a sorkarin sum a senso zat hi tunah chuan kum khatah cheng nuai 4,500 vel a ni dawn nia sawiin Lallianchhunga chuan, "Sorkar hnathawk lak belh a piangin kum tin a pung zel dawn a, Mizoram ang state rethei zawk tan zawh loh hun a awm thei dawn. MNF kaihhruai Mizoram sorkarin sum leh paiah harsatna lian tak a tawh mek avangin sorkar hnathawkte'n a hunah hlawh an lak theih lohna a rei tawh hle a, Congress hun lai khan sorkar hnathawk nghette hlawh lak theih loh a awm ngai lo," a ti.

MPCC Media Chairman chuan, MNF sorkar hnuaiah sum leh paia harsatna lian tham a awm mek laia NPS tana kum tin cheng nuai 4,000 chuang sèn a ngai ziah chu sorkar tan pawh phurrit a tlin thu a sawi a, "Mizoram tan chuan NPS aiin OPS hi a zângkhâi rih zawk a ni," a ti bawk.

MPCC MEDIA TARLAN ṬHENKHAT

▶ NPS hi Mizoram sorkarin September 2010 aṭangin a hmang a, NPS hnuaiah pension-a chhuak an la awm tam lo.

▶ NPS-ah hian sorkar tan zângkhaina tur a awm lo a, OPS hman hian senso a pun phah vakna tur tunah chuan a awm chuang lo.

▶ NPS hi sorkar laipui hnuaia thawk tam takin an duh lo a, sorkar laipui pawhin NPS a kalpui mek hi a khua leh tuite ṭhat tlânna ber tura ennawn turin Finance Secretary,l kaihhruaina hnuaiah April 6, 2023 khan Committee a din.

▶ Sorkar laipui hnuaiah pawh OPS-ah kan let leh vek lo ang tih a sawi thei loh.

▶ Sorkar laipuiin kum 2003-a advertisement chhuah hmanga kum 2004-a sorkar hnathawk an lakte pawh OPS a hmantir leh mek.

▶ OPS-a let leh ni se tia kan aupui hi vote zawnna ngawr ngawr a ni lo a, ram sum leh pai dinhmun chhe zual zel tur venna a ni.