MANIPUR BUAINA : Tangkhangte hruai nan thlawhtheihna ruahman; Mizote harsatna sukiang turin hma kan la - CM

Manipur buaina avanga tangkhangte Mizoramah hruai luh an nih theih nan Mizoram sorkar chuan hruai chhuahna turin thlawhtheihna a ruahman. Chief minister Zoramthanga chuan, tangkhangte'n Aizawl an thlen ngei theih nan hma an lak thu a sawi. Manipur buaina chungchangah hian kohhran leh pawl hrang hrangin ngenna an tichhuak a ni.

Theihtawpin hma kan la - CM

CM Zoramthanga chuan nimin khan thuchah tichhuakin, Manipur buaina avangin state dang aṭanga Manipur-a awmte'n harsatna namenlo an tawh thu a sawi a, "Mizoram sorkar pawhin, a bik takin Mizoram aṭanga Manipur-a awmte harsatna sukiang turin theihtawpin hma kan la a ni," a ti a; Union Home minister Amit Shah leh Manipur CM N Biren Singh te a biak thu a sawi.

Zoramthanga chuan, official-te pawhin nasa taka hma an la thu sawiin, "An himna turin vawi tam inbiain hma kan la. Zirlaite leh a bik takin Imphal-a tangkhang laklawhte an lo chhuah theihna turin thlawhna pawh charter a, Imphal aṭanga han la chhuak turin kan bei mek a, tih thuai pawh kan tum a ni... Imphal-a awmte'n Churachandpur leh a chhehvel, an chenna hmun him taka an thlen theihna turin Manipur CM nasa takin ka nawr a, 'Ka lo ti ngei ang e,' a ti bawk," a ti.

Manipur-a buaina chhuah chhan chu pawi an tih thu sawiin CM Zorama chuan, "Dawhkana thil sawi fel theih ni se la ṭha tur a ni a. Chutiang ni loa mipui leh mipui inkarah buaina a lo chhuah takah chuan chingfel tur hian Manipur sorkar leh central sorkar pawh hian chak taka hma an lak kan duh," a ti a; buaina a kal zel ṭha an tih loh thu a sawi.

Zoramthanga chuan, buaina avangin Mizoram depa tlang mi te, Churachandpur leh a chhehvela mite'n ei leh barah harsatna an tawh a hlauh thu sawiin, "Harsatna chu an tawk palh a nih phawt chuan kan theihtawpin Mizoram aṭangin lo ngaihtuahpui a, an lak luh theihna tur lo ngaihvensak kan inpeih a ni," a ti.

Chief Minister chuan, Zo hnahthlakte puih zel an tum tih a sawi bawk.

Tangkhang hruai nan thlawhtheihna

Imphal-a tangkhangte Mizoramah hruai an nih dan turah Mizoram Home department leh GAD (Aviation Wing) chuan nimin khan ruahmanna an siam.

Home department chuan hriattirna chhuahin, Manipur leh Imphal khawpuia tangkhang mekte Mizorama hruai hawna turin thlawhtheihna ruahman a nih thu an tarlang. Tangkhangte Mizorama hruai luh chungchanga hriat chian duh nei tan phone number - 0389-2334327/2335359, 9862899962 (whatsapp) leh 8787784958-ahte biak theih a ni.

Inhmakhua tura ngenna

Aizawl Bawrhsap chuan May 4 khan ngenna tichhuakin, Manipur buaina avanga Mizorama thil hrang hrang thleng theiah inhmakhua turin village/local council-te leh YMA-te a ngen.

Aizawl DC chuan, Manipur buaina avangin sahimna zawngin Zo hnahthlakte Mizoramah an rawn lut thei tih tarlangin, chutiang an awm a nih chuan lo tuamhlawm thei tura ruahmanna siam tur leh inring turin VC/LC Disaster Management Committee leh Central YMA President a ngen a ni.

Sahimna zawnga Mizorama lut an awm a nih chuan an chanchin kimchang taka lo chhinchhiah turin Bawrhsap chuan VC/LC-te a chah a; CYMA President chu YMA branch hruaitute hnenah, an hmunhma remchangte a ṭul huna hman theih tura lo buatsaihtir turin a ngen a ni.

Mizorama awm Manipur mite'n harsatna an tawh loh nan leh boruak ṭha lo a chhuah loh nan khua/veng mipuite inzirtira infuih turin VC/LC leh YMA branch-te Aizawl DC chuan a ngen bawk.

MKHC Chairman ngenna

Mizoram Kohhran Hruaitute Committee (MKHC) chairman Rev. Dr C Chawnghmingliana chuan ngenna tichhuakin, buaina avanga chenna in leh biak-in tam tak hal a ni te, thi leh hliam eng emaw zat an awmte chu pawi an tih thu leh an tawrhpui thu a sawi.

MKHC Chairman chuan, Manipur-a Mizote tawrhna aṭangin Mizoramah thungrulh duhna awm thei a nih thu sawiin, "Thungrulh duhna rilru nei a, Mizorama Meitei awmte chunga kut thlak ve mai duhnate pawh lo piang ve mai thei a ni a, thungrulh nana Mizoram chhunga kut lo thlak ve mai hi Kristiante tih turah kohhran chuan a ngai lo. Ringtu kan nihna hre rengin, lungmuang taka an awm theihna tura hmanngaihna lantira lo veng him zawk turin kohhran aiawhin Zoram mipui ka ngen a ni," a ti.

Presbyterian Church of India

Presbyterian Church of India (PCI) General Assembly chuan thuchhuah siamin, Manipur-a buaina chu lungchhiatthlak an tih thu leh harsatna tawkte an tawrhpui thu an tarlang a, "In tam tak bakah, biak-inte thlenga beih a ni leh hal a ni hian kan rilru a tina a, mi tam takin an in an chhuahsan a ngai hi a pawi kan ti hle," an ti.

PCI chuan, buaina avanga thite leh hliamte an tawrhpui thu sawiin, "Kan ṭawngṭainaah kan hre reng a ni," an ti a; remna, muanna leh ralmuanna a awm theih nan leh mipui an him theih nan buainaa inhnamhnawihte chu duhtawk tawh tur leh an thiltihte titawp turin an ngen.

PCI Assembly chuan, Manipur-a hnam hrang hrangte leh an in leh lote a him theih nan hma la turin sorkar an ngen a, "Sakhaw hmunte venghim turin kan ngen a, buaina hmet mit turin kan ngen. Chutiang tur chuan tih theih kan nei a nih chuan kan inhuam reng a ni," an ti. Manipur-ah remna leh muanna a awm theih nan ṭawngṭai turin mi tin an ngen bawk.

NEICC ngenna

Hmarchhak biala kohhran leh para church hrang hrangte intelkhawmna North East India Christian Council (NEICC) chuan, Manipur buaina avanga mi eng emaw zat thi leh hliam an awm leh, in leh bungrua tam tak tihchhiat a ni chu pawi an tih thu an tarlang a; thi leh hliamte leh harsatna tawk zawng zawng an tawrhpui thu sawiin, remna leh muanna a awm theih nan ṭawngṭai turin mi tin an ngen.

NEICC chuan, biak-in tam tak suasam a ni leh hal a ni chu an dem thu tarlangin, sakhaw hmunte inzahsak turin an ngen a, "Manipur-a thil thleng hi hmarchhak bial mipui tan thil duhawm lo ber leh zahthlak a ni a, sorkar thuneitu zawng zawngte leh pawl hrang hrangte chu inremna a awm theih nan hmala turin kan ngen a ni," an ti.

MNF Ṭhalai

MNYF chuan nimin khan rorel inkhawm an nei a, Manipur tualchhung buaina vanga Zo hnahthlakte thlavang hauhna leh Manipur-a remna leh muanna a awm thuai an duhzia lantir nan vawiin chhun dar 12 hian Vanapa Hall kawtah inkhawm (peaceful demonstration) neih an rêl a, "Political party kan nihna te dah ṭhain Mizo mipui, ram leh hnam hmangaihtu zawng zawngte lo tel vek turin MNYF chuan a sawm takzet che u a ni," an ti.

Mizoram PYD

Mizoram UPC General PYD pawhin thuchhuah siamin, Manipur tualchhung buaina avanga thi leh hliam leh, biak-in tihchhiat a ni chu pawi an tih thu an tarlang a; remna leh muanna a awm theih nan an member-te chu theihtawp chhuaha ṭawngṭai turin an ngen.

Pawl dangte

Manipur state chhunga Zo hnahthlakte leh Meitei-te inkara buaina chhuak chungchangah pawl hrang hrangin thuchhuah an lo siam tawh a; tun hnaiah pawh MSU, ZORO, Zofa Global Network, Delhi MZP leh, Mizoram University-a pawl pathum - Students Council, Teachers Association leh Non-Teaching Employees Association-te pawhin thuchhuah an siam a ni.