Champhai district-a thubuai 34% ruihhlo kaihhnawih

Director general of police (DGP) Devesh Chan­dra Srivastva chuan May 4, Ningani khan Cham­phai Police Station leh SP office a tlawh. Kumin January - April thla chhunga Cham­phai district-a thubuai ziah luh 65 zinga 34% chu ruihhlo kaih­hnawih a nih thu tarlan a ni.

Devesh Chandra Srivastva chuan, ramri depa awm Champhai police-te kaltlanga dan loa thil tih man leh vèn a ni ṭhin chu fakawm a tih thu a sawi a, "Pawikhawihna thleng hrang hrangah thubuai ziah luh tam hreh lo u la, hnu chhui hmanhmawh luata tihsual palh a awm loh nan fimkhurin taima ang che u," a ti.

Mizoram Police force lama indaih lohna awmte leh hmeichhe police awm belh ngaihnate pawh a ṭul anga ngaihtuah zel tum a nih thu DGP chuan a sawi a; MLA inthlan awm turah police-te chu àwn lam nei lo turin a chah.

Champhai SP Lalrinpuia Varte tarlan danin Champhai district hian Indo-Myanmar border km 160 vela thui a nei a, border pillar pathum a awm. Sub-division pakhat, police station pathum leh beat post pakhat, immigration check post pakhat, police checkgate pahnih a awm a; khaw 20-ah village defence party (VDP) siam a ni a, 2nd Assam Rifles & 42nd Assam Rifles-te khaw pasarihah an awm bawk; Champhai DEF hnuaiah hian thawktu 130 an awm mek.

DGP hian Champhai Vengsanga Police Complex-a Mizoram Police Khualbuk a hawng a; tlai lamah Zokhawthara police checkgate, police station leh, Assam Rifles hmunhmate a tlawh bawk a ni.

CHAMPHAI DINHMUN
(January 1 - April 30, 2023)

▶ Champhai district-a police station pathumah thubuai 65 ziah luh a ni.

▶ Champhai PS-ah thubuai 49, Zokhawthar PS-ah thubuai pakua leh Dungtlang PS-ah thubuai pasarih an ziak lut.

▶ Thubuai ziah luh zawng zinga 34% chu ruihhlo (NDPS) kaihhnawih a ni.

▶ Rukruk thubuai 22% leh mi in rawk thubuai 6% a awm.

▶ Pawikhawihna thleng avanga mihring man zinga 18% chu ram dang mi (foreigner) an ni.

▶ Heroin (No. 4) kg 7.5, metham-phetamine kg 2.2 leh kuhva rah kg 67,540 man a ni.