KHAWTHLIR

Thisen pe

Zoram Medical College zirlai, 2021 batch-te chuan nimin khan ZMC Blood Bank-ah thisen unit 16 an pe a, petute mipa 11 leh hmeichhia panga an ni. Nimin vêk khan Siaha District Hospital-ah LIKBK Ṭhalai Pawl, Siaha Bial-in thisen unit 19 leh KṬP, Siaha ECM Vaih branch-in unit 8 an pe bawk.

Cleanliness Drive

Mizoram State Bharat Scouts & Guides chuan nimin zing khan Aizawl Municipal Corporation bultumin Aizawl khawpuiah bawlhhlawh thenfai hnatlang, Cleanliness Drive an nei a, Scouts & Guides state chief commissioner hlui Zothanmawia'n a hmanpui. Hnatlangah hian scouts & guides-te, scoutmaster, guide captain leh commissioner eng emaw zat an tel.

Tanpuina hlan

Mizoram Pradesh Youth Congress Committee (MPYCC) president Dr Lalmalsawma Nghaka chuan Manipur-a buaina tâwk mek Zo hnahthlakte chhawmdawlna atan a ṭulna apianga hman turin nimin khan Central YMA hnenah Rs 1,00,000 a hlan.

Meth man

CID (Special Branch) te chuan May 4, Ningani zan khan an thudawn bawhzuiin Lalsangliana (30) s/o Lallawmpuia (L), Tahan D-Group, Myanmar nia inchhal kut aṭangin Bawngkawn Durtlang road-ah methamphetamine kg. 5.4 an man. CID-te'n methamphetamine an man hi international market-ah cheng vbc. 11 man hu a ni a, Bawngkawn PS-ah thubuai ziahluh a ni.

YMA Career Fair

YMA, Electric Veng Branch hnuaia Literature & Education Sub-Committee chuan nimin khan an veng YMA hall-ah Career Fair an buatsaih a, bialtu MLA C Lalmuanpuia'n a hawng. Fair hi zirlaite an zirna leh an hma hun atana kawng kawhhmuhna tura buatsaih a ni a, stall pariat hawn a ni.

Meizial man

Serchhipa hmunpui nei 23 Sector Assam Rifle-te chuan May 4, Ningani khan Zokhawtharah Rs 1,53,40,000 man ramdang meizial an man a, Zokhawthara Land Custom Station hnenah dan anga hmalak zui turin an hlan.