Chhimphei Group YMA-in kawngpui nék lo turin ngên

YMA, Chhimphei Group chuan, Aizawl khawpui aṭanga chhim lam, Melthum Silaimual aṭanga Chhimphei Group huam chhung kawngpui kama in sa turte chu kawngpui nék lo tur leh hnaih lutuka in sa lo turin an ngen.

Chhimphei Group YMA hian kumina inkhawmpui an neihah, "Chhimphei Group huam chhung mai bakah, Silaimual/Melthum thlenga kawngpui kama in sa tur reng rengin kawngpui an nek lohna turin hmalak ni rawh se," tiin an rel a ni.

Aizawl-Lunglei World Bank Road-ah kawngpui hnaih tak taka in sak a awm tawh ṭhin thu tarlangin Chhimphei YMA chuan, Chhimphei Group huam chhung bakah, Silaimual leh Melthum thlengin kawngpui kama in sa turte chu kawngpui zah tur leh in an sakna hmun tura VC/LC leh YMA enpuinaa ban khur lai ṭhin turin an chah a ni.