BJP-in an candidate thah tuma ruahman lawkah puh

BJP Mizoram chuan CADC General Election vawi 11-na neih tura an party candidate Amit Kumar Chakma tualthihna chu ruahman lawk anga an ngaih thu an puang.

BJP Mizoram chuan nimin khan thuchhuah siamin, May 4, Ningani zana CADC MDC inthlana an official candidate Amit Kumar Chakma thihna chungchangah BJP State Office aṭangin nimin khan Chawngte SDPO leh OC-te an biak thu an tarlang a, "He tualthihna thleng hi ruahman lâwkna awm niin kan ngai a, Mizoramah meuh hetianga inphiar rûkna ang thil awm hi a zahthlak kan ti," an ti.

Amit Kumar Chakma thihnaah hian party ṭhen­khat inhnamhnawih an awm ngei an rin thu tarlang BJP chuan, "Politics chu ram siamṭhatna tura intlansiak kan nih laia tualthihna hial a thleng ta hi pawi kan ti tak zet. He tualthahnaa mawhphurtute a rang thei ang bera zawng chhuak a, na taka hremna pek an nih ngei kan phut a ni," an ti.

Tualthihna thlennaa hliam tuarte leh Amit Kumar Chakma nupui chu nimin khan MBJP state general secretary Lalthang­mawii leh hruaitu dangte'n an tlawh nghal tih an tarlang bawk.