Airport cute ber siam tumin CM a phar buai hle - MPYCC

Mizoram Pradesh Youth Congress Committee (MPYCC) chuan, Mizorama inkharkhip chhungin Lengpui Airport siamṭhat mek chu Chief Minister-in mipui hriatah ṭum thum a tlawh tawh tih sawiin, airport cute ber siam tumin CM chu a phar buai hle niin an tarlang.

Inkharkhip vanga thlawhtheihna thlawh theih loh lai chuhin Lengpui Airport runway siamṭhat hna thawh a ni tih sawiin MPYCC chuan, mipuite Co­vid-19 doa an phêk buai laiin CM Zoramthanga chuan hnathawh mek chu inkhàrkhip chhungin April 29, May 9 leh May 18-ahte a tlawh tawh tih an sawi a, "Ramria task force te, volunteer duty te, police duty-te emaw, damdawi lama thawkte emaw ngaihvenin a la zin chhuak lo a, Covid-19 veite enkawlna tur bika ruat Referral Hospital pawh a la tlawh lo," an ti.

Congress ṭhalaite chuan, March 1, 2020-a Lengpui Airport-a IndiGo service thar lawmnaah CM Zoramthanga'n 'Airport lian ber kan siam thei lo ang a, airport mawi ber leh cute ber siam kan tum,' tiin a lo sawi tawh tih an tarlang a; "A upat deuh tawh avanga che chhuak ngam loa kan lo ngaih laia ngampa taka Lengpui Airport vawi eng emaw zat a tlawh ngam si hi a mak kan ti hle," tiin, CM chuan a thusawi 'airport cute ber' tihhlawhtlin tumin runway cute ber aṭanga siam ṭan a tum mek nia an ngaih thu an tarlang.

MPYCC chuan, CM Zoramthanga, Finance minister ni bawkin Mizoram sorkar sum dinhmun hre lo mah se, Lengpui Airport thawm ṭhatna senso chu a hre tura an ngaih thu leh, Lengpui bul lawk, Lengte rama mau hardening-na hmunpui pawhin nasa taka hma a sâwn phah an beisei thu an sawi bawk.

Ramri-a duty task force duty-te a la tlawh lo

Covid-19 vei enkawlna Referral Hospital a la tlawh lo

Police, damdawi lam duty leh volunteer tlawhin a la zin lo 

Hri leng hnuaiah Airport vawi thum a tlawh tawh lawi si