Online Edu-Challenge result puang

State Council of Educational Research and Training (SCERT), Mizoram buatsaih Online Edu-Challenge 2020 chawlhkar ngana intihsiak result nimin khan puan a ni.

Intihsiak hi primary school leh middle school zirlaite leh zirtirtute tana buatsaih a ni a; primary school zirlaite tan 'Arpui sen tê' thawnthu hmang leh middle school zirlaite tan 'Mauruangi' thawnthu hmanga lemziaka intihsiak buatsaih niin, zirtirtute tan 'Chhiar­kawp hlimawm' tih thupui hmangin video clip insiamsiak buatsaih a ni thung.

Zirlai intihsiaknaah primary school-ah Amos K Zaithanpuia, class-II, Holy Mission School pakhatna a ni a; middle school-ah Diana J Thatiphangia­rili, class-VI, Don Bosco School pakhatna a ni. Zirtirtuah Lalrammawia, Ratu P/S-III pakhatna a ni bawk.

Edu-Challenge 2020 chawlhkar rukna intihsiakna an ṭan leh nghal a, secondary level (HS leh HSS) tana buatsaih a ni. Zirlaite tan an ṭhiante hnena inkharkhip laia an hun hman dan an hrilhna lehkhathawn ziah tur a ni a; zirtirtute tan algeb­ra zirtirna atana lesson plan siam tur a ni thung. SCERT chuan Mizorama zirlai leh zirtirtu a tam thei ang ber intihsiaknaa tel turin an sáwm a ni.

Online Edu-Challenge-a lawmmante chu tun kum kum tawp lama SCERT Ruby Jubilee lawmnaah sem a ni ang.