Manipur buaina: Mi 100 chuangin Imphal an chhuahsan tawh; Raltlan tam tham takin Mizoram an lut
Mizoram sorkar chuan Manipur buaina avanga harsatna tawk Imphal leh a chhehvela zirna leh thil dang avanga awm Mizoram mi hruai chhuak turin thlawhtheihna a hire thei lo. Hetihlai hian Mizoram sorkar ruahmannain mi 100 chuangin Imphal an chhuahsan tawh a, Churachandpur leh a chhehvel aṭangin mi eng emaw zat an rawn tlanchhia.
Home Commissioner thu
Home commissioner H Lalengmawia chuan May 6, Inrinni khan thuchhuah siamin, Manipur buaina chhuak vanga Mizoram mi leh sa tangkhangte hruai haw tura Mizoram sorkar hmalak mek dan a sawifiah a; Manipur-a Mizo tangkhangte hruai chhuak turin thlawhtheihna hire tuma theihtawpa beih ni mah se, an beidawng ti tih tawh tih a tarlang.
H Lalengmawia chuan May 5-a Mizoram sorkar hmalakna an tarlanah, Mizoram sorkarin Imphal leh a chhehvela Mizoram mi leh sa dik tak tangkhangte hruai chhuah nan thlawhtheihna a hire dawn tia an sawi thu tarlangin, "Theihtawp kan chhuah chungin kan bei a dawng ti tih tlat mai a, thlawhtheihna charter lamah harsatna kan nei ta a ni. Nimahsela hetiang a ni chung chung pawhin kawng dang dapin commercial flight awm ang angah ticket kan book nghal char char a, theihtawp kan chhuah mek a ni," a ti.
Home Commissioner sawi danin, a remchan dan ang angin flight/airline chi hrang hrangah ticket an book phawt rih lo thei lo. Commercial flight a nih avangin midang tam takin ticket an book ve a, an charter thei ta si lo nen an beisei ang leh an duhthusam angin booking an ti chak thei lo a, pawi an ti takzet.
Mizoram sorkarin theihtawp a chhuah zel a, Home department bakah, department danga official-te leh travel agency-te nen hmun khatah ṭhukhawmin ticket booking hi an buaipui char char a ni.
Harsatna hi eng chen nge a thlen dawn tih hriat a ni lo tih sawiin Home Commissioner chuan, "Chuvangin Manipur-a cheng kan unaute Mizoram lama rawn insuan thla duh, tlang kawnga rawn luh ngai an awm thei. Tunah pawh engemawzat chu raltlanin an rawn lut der tawh. Chuvangin, Ngopa khuaa petrol/diesel filling station-te pawh tuialhthei chungchangah stock tam zawk nei thei tura ruahmanna siam turin kan hrilh tawh a ni," a ti.
H Lalengmawia chuan buaina hi a reh hma loh chu Mizoram sorkarin a mi leh sate hum turin theihtawp a chhuah dawn a, a mi leh sa ten harsatna an neih lohna turin a bei chhunzawm zel dawn tih ringhlel lo turin mipui a chah.
Hetihlai hian Mizorama Meitei-ten an tawrh vena tur awm ang zawnga hmalak leh thil thleng awm lo turin Mizoram sorkarin mi tinte a chah tak meuh meuh thu a sawi.
Imphal aṭangin inphur chhuak
Mizoram sorkarin thlawhtheihna hire thei lo mah se, commercial flight ticket a lak hmangin mi eng emaw zat chuan Imphal an chhuahsan tawh. Mahni sum senga flight ticket la a, Imphal chhuahsan pawh an awm.
May 6, Inrinni zan khan mi 50 chuan Mizoram sorkarin flight ticket a lak sak hmangin Guwahati an thleng a, Mizoram House-ah thlen tir an ni. Mizoram House aṭang hian Mizoram sorkar chuan Mizoram an rawn thlenna turin motor a ngaihtuahsak a, ṭhenkhat erawh mahni sensoin an rawn haw.
Nimin khan mi 78 chuan Imphal aṭangin Kolkata an thleng a, anni pawh hi Mizoram House panpui an ni. Kolkata aṭang hian engtin nge Mizoramah an rawn haw dawn tih hriat a la ni lo a, he thuziah lai hian Mizoram sorkarin a ngaihtuah mek nia thudawn a ni. Mizoram sorkarin ticket a laksak hmanga rawn haw tur eng emaw zat an la awm.
Hetihlai hian, mahni pawisa senga Imphal aṭanga rawn haw pawh eng emaw zat an awm a, ṭhenkhat chu thlawhtheihna ticket lain Lengpui Airport an rawn thleng.
Raltlan an tam
Churachandpur leh a chhehvel aṭangin Zo hnahthlak eng emaw zat chu Mizoramah an rawn lut tawh a, Ngopa leh a chhehvelah mi ṭhahnem tak an awm a; khaw dang leh Aizawla mahni chhungte bêl tura tlang pawh eng emaw zat an awm nia thu dawn a ni.
Thu dawn danin raltlan hi Ngopa khuaah an tam ber a, YMA-te'n ei tur an siam sak. Ṭhenkhat chuan an chhungte an belh laiin, a tam zawk chu an khua-a centre ruakah riahtir an ni. Aizawl leh khaw danga tlangte chu an chhungte bel tur an ni.
Raltlan hi nizan thleng khan an la rawn luh belh zel a, Ngopa khua leh a chhehvelte chuan a theih ang angin raltlante hi lo dawnsawn a, khawtlangin chhawmdawl zel an tum.