Zo hnahthlakte harsatna tawh MKHC, MJA, party leh NGO-te'n an sawiho
Mizoram Kohhran Hruaitute Committee (MKHC), political party hrang hrang, Mizoram Journalist Association (MJA) leh NGO hrang hrangte chu May 6, Inrinni khan Central YMA pisa-ah an ṭhukhawm a, Manipur-a Zo hnahthlakten harsatna an tawh chungchang an sawiho.
Ṭhukhawm chuan Manipur tualchhung buaina vanga Zohnahthlakten harsatna an tawh leh a kaihhnawih chungchanga Mizoram sorkar leh Central YMA hmalakna lawmawm an ti a, an hmalakna an thlawp.
Meeting thuchhuak
* Manipur tualchhung buaina avanga mi tam takin nunna an chân leh, in leh lo leh sakhaw biak-inte hal leh tihchhiat a ni hi pawi kan tiin, thinlung takin kan tuarpui tak zet a ni.
* Manipur-a remna leh muanna ṭha tak a awm theih nan chak taka hma la turin Manipur sorkar leh Central sorkar kan ngen a, Mizoram sorkar pawh chak taka hma la zui zel turin kan ngen bawk a ni.
* Ei leh bar, ni tin mamawh hrang hrangah harsatna an tawh lohna turin ṭan la tlâng turin Mizo mipuite kan ngen a, he buaina avanga mimal hlawkna leh inhaivur zawnga hma la lo turin kan in ngen e.
* Manipur aṭanga sahimna zawnga rawn lutte tumah inthliarna awm loin lawm takin kan lo dawngsawng zel a, Mizoram mipuite pawh theihtawpa lo dawngsawnga lo tuamhlawm turin kan inngen a ni.
* Manipur-a tangkhang mek kan unaute him taka Mizoram an lo let theihna tur leh an chenna hmuna nunphung pangngai tak an kalpui ve leh theih nan hma la turin Mizoram sorkar kan ngen a ni.
* Manipur tualchhung buaina avanga Zo hnahthlak unaute tawrhna chungchang leh a kaihhnawihte hi central sorkarah thlen ni se kan ti. All party, NGO leh MKHC-ten aiawh intirin New Delhi-ah central sorkar thuneitute hmuh ni se kan ti.
* He buaina avanga harsatna tipunluntu ni lo a, remna siamtu ni ṭheuh turin Mizo mipuite kan inngen a ni.