Ṭhalai tam tak ruihhlo laka an filhlim theih nan infiamna uar a ṭul - R Lalzirliana

Aizawl District Football Association (ADFA) chuan May 5, 2023 khan Art & Culture Auditorium, Berawtlangah Silver Jubilee an lawm a, Art & Culture minister R Lalzirliana'n a hmanpui. Minister chuan, ṭhalai tam tak ruihhlo laka an filhlim theih nan infiamna uar a ṭul thu a sawi.

Lalzirliana chuan, ṭhalai tam tak ruihhlo laka an filhlim theih nan infiamna uar a ṭul thu a sawi a, "Football tihhmasawn hi ruihhlo dona kawng pawimawh tak pakhat a ni. Mahni sum leh pai sèn ngaih cháng a tam hle a, football hmangaihtu tak tak tan lo chuan hruaitu nih a har a, ADFA hruaitute pawhin sum leh pai, thâ leh zung tam tak an seng tawh a,a hlawhtlinna pawh hmuh niin Aizawl district aṭangin footballer ṭha tak tak an lo chhuak mek zel," a ti a, ADFA hnathawh chu fakawm a tih thu a sawi.

Football Association hrang hrangte chu Zofate tana hlawhtlinna thlentu pawl lian ber an nih thu sawiin Minister chuan, "Association-in harhsatna tam tak in tawh chângin beidawng mai loin hmalam pan tlat ula, Mizoram sorkar pawh a theihna zawnah pui turin a awm reng," a ti a, football hruaitute chu football hmasawnna chauh ni lo, Zofate hmasawnna leh inlungrualna tura thawk an ni tih in hre reng turin a chah.

Mizoram Football Association (MFA) honorary secretary Lalnghinglova Hmar pawhin thu sawiin, football hruaitu ni tur chuan inpekna tak tak leh chân huama thawh a ngaih thu leh, ADFA hruaitute inpek leh thawhhrimna fakawm a tih thu a sawi. Tun dinhmunah refree in daih lohna a nasat avangin helamah hian hma la turin ADFA hruaitute a ngen nghal a ni.

ADFA hnuaiah hian zone paruk a awm a, kum 2022-2033 chhungin ADFA chuan club 34 - I Division Club pariat, II Division Club pariat leh III Division Club 18 a enkawl a ni.