Khawthlir

Thisen pe

May 6, Inrinni khan LIKBK Ṭhalai Pawl, Lungtian Bial chuan Lawngtlai District Hospital tan thisen unit 31 an pe a, petute mipa 28 leh hmeichhia pathum an ni. KṬP, Siaha West Bial-in Siaha District Hospital tan unit 21 an pe a, petute mipa 20 leh hmeichhia pakhat an ni. KṬP, Himali Bial member mipa 13 leh hmeichhia pakhatte'n Synod Hospital tan unit 14 an pe bawk.

In sak sak

Darlawn Venghlun Village Council leh Venghlun Branch YMA ṭangkawp chuan an veng chhunga khawsak harsa chhungkaw pakhat chenna tur in an sak sak a, MHIP-te ei tur siamin an hnatlang thung. In sakna atan hian veng chhung mi inphalten pawisa, hmanrua leh lirthei an tum a, a chung tur rangva chu bialtu MLA Lalchhandama Ralte-in a tum. In hi May 1, 2023 aṭanga sak ṭan niin, May 6, 2023 khan sak zawh a ni.

Tui tla

Ziontlangmawia (24) Pang khaw mi, zirna avanga Aizawl Khatla venga awm mek chu May 6, 2023 Inrinni tlailam khan Tlawng luia Nghalchawm Kaiah chesualin a thi. A ruang hi mi tlawmngaiten an la chhuak nghal a ni.

Curfew puang

Chawngte sub-divisional magistrate Lalneihthanga Colney chuan Chakma Autonomous District Council (CADC)-a Rengkashya bialah Cr. PC 1973 Section 144 tlawh chhanin zana pawn chhuah khapna (curfew) a puang. Curfew hi May 5-10, 2023 chhungin zan dar 7 aṭanga zing dar 4 inkarah kenkawh a ni dawn a, thupek bawhchhiate chu IPC Section 188 hmanga hrem an ni ang.

Army Chief bia

Lok Sabha MP C Lalrosanga chuan May 6, Inrinni khan chief of the army staff General Manoj Pande chu phone-in a bia a, Manipur buainaa sipaite chetvelnaah mipui te, a bikin tlang mite rin hlawh zawnga boruak siam tur leh boruak ṭha siam zawnga tlang mite laka che tura hma la turin a ngen. Army Chief chuan mipui rin hlawh zawnga che tura sipai hotute a hriattir tur thu a lo hrilh niin sorkar thu­chhuahin a tarlang.