Zofate nekchep duh loh lantirna huaihawt

Mizo National Youth Front (MNYF) bultumin May 6, Inrinni khan Vanapa Hall kawtah Zofate nekchep an nih duh loh lantirna atan sitting demonstration neih a ni.

He hunah hian MNYF president Dr L Thangmawia, MLA chuan an thil huaihawt chu party thila lak chi a ni lo tih sawiin, "A fatu chauh kan ni, Chief Minister hoin nimin lamah Home department, tlawmngai pawl hrang hrang, hnampual zirlai pawl leh mimal ang pawn a puih theih ang ang kan inpui. Chumi atâna che chhuak zawng zawngte chungah lawmthu kan sawi a ni," a ti.

Dr L Thangmawia chuan hun harsa tak tâwkin Zo hnah­thlak Manipur hmun hrang hrangah an awm mek tih sawiin, "Mizoram aṭanga zirlai awmte leh zin veivak tangkhang pawh an awm. Hengte pui tur hian Chief Minister thu angin sorkar hotute'n hma an la mêk," a ti a, Manipur-a Zo hnah­thlakte pui tur leh a tih theih ang ang ti turin Pathianniah (nimin) khan an kal dawn thu a sawi.

Remna leh muanna an duh thu sawiin MNYF President chuan, "Helai aṭanga zirlaite leh tangkhangte chhan­chhuahna kawnga sorkarin hma a lâknaah harsatna siam an awm a nih chuan Mizoram history-ah a chuang ve reng tawh ang," a ti.

Thusawitu dang MNYF vice president Zodinpuia chuan, an duh ber chu remna leh muanna a nih thu sawiin, "Zofate hi kan duh vang ni loin ram pathum India, Myanmar leh Bangladesh ahte ṭhendarha awpbehin kan awm. Ram hrana kan awm avang hian kan nunphung leh chetzia a lo danglam deuh a nih pawhin unau kan nihna hi a bo lo," a ti a, ṭanpui an ngaih hunah chuan khawvel ramri khamin unau inhmangaihna a ṭhen hrang tur a nih loh thu a sawi.

Resolution an pass-te
1. Manipur-ah remna leh muanna a awm leh thuai a, mi tinte thlamuang taka an awm leh thuai kan duh tak zet. Remna leh muanna a awm theih nan Mizo mipuite sorkar, kohhran leh tlawmngai pawlte zâi ngai hram hram turin kan ngen a ni.

2. Manipur tualchhung buaina hi a rang thei ang bera chinfel a nih theih nana chak taka hma la chhunzawm zel turin sorkar laipui leh Manipur sorkar kan phut a ni.

3. Manipur-a remna leh muanna a awm theihna tur leh kan mi leh sa leh zirlai tangkhangte ṭanpui tura Chief Minister Zoramthanga hmalakna hi chhuanawm kan ti a, Manipur sorkar pawhin tangkhangte lachhuak tura Mizoram sorkar hmalakna lo tikhawtlai loa, lo pui nghal zel turin kan ngen a ni.

4. Manipur-a kan Zo hnahthlak unaute an harsatna tawh apianga ṭanpui zel turin an kiangah kan ding reng dawn a, he buaina avanga kan unau sahimna zawnga Mizoram rawn pante hmangaihna nen lo kuangkuah turin Mizo mipui zawng zawngte kan ngen a ni.

5. Myanmar, Bangladesh leh Manipur-a kan chipui leh unaute harsatna tawh chhawmdawl tura tlawmngai pawl leh kohhran, political party hrang hrangte ṭanrualna hi lawmawm kan ti. Mizo mipui ṭanrualna hian Zofate inpumkhatna ṭha zawk a siam kan beisei tlat a ni