Churachandpur-ah damdawi thawn chho dawn

Health & Family Welfare Board vice chairman Dr ZR Thiam­sanga kaihhruaiin nimin khan Health & Family Welfare department hruaitute an ṭhukhawm a, Manipur buaina vanga Churachandpur damdawi-inah damdawi indaih lohna a awm avangin vawiin zing dar 8-ah Civil Hospital Aizawl aṭangin damdawi thawn an rêl.

Ṭhukhawm chuan Manipur buaina avanga Churachandpur District Hospital-in damdawi an tlakchham avangin emergency leh mamawhna apianga an hman turin damdawi ṭhahnem tak thawn ni se, an ti a; Health department bakah Indian Medical Association, Mizoram Branch leh Dental-te'n damdawi an khawn khawmte nen May 7, 2023, vawiin zing dar 8-ah Civil Hospital, Aizawl casualty aṭanga thawn chhoh tura tih a ni.

Emergency-a hman tur damdawi leh hmanraw dang eng emaw zat chu nimin khan Ngopa CHC leh Khawdungsei PHC aṭangin thawn chhoh a lo ni tawh.