Tlawng luiah tui a tlem chho telh telh; Leivung paih vangin Tuichang lui a nû

March 7, 2022 khan Tlawng luiah tui litre maktaduai 121 a luan laiin, kumin March 6 khan litre maktaduai 58 a luang a; National Highway kawng laihna leivung paih vangin Tuichang lui chu furpui a lo thlen hunah tui a nu dawn.

Khawzawl Vengthar Branch YMA in Tuimuk lui din thar lehna 2022-2025 an kalpui mekah May 6, Inrinni khan Tuimuk luidung thenfai hnatlang an nei a, he hun hmanpuitu Khawzawl PHE WATSAN Division EE Liantluanga Chohte chuan, March 7, 2022-ah Tlawng luiah tui litre maktaduai 121 a luan laiin, kumin March 6 khan litre maktaduai 58 chauh a luan thu a sawi a; Tuichang luiah kawng laihna leivung paih a tam avangin tui a nu nasa tih a sawi.

Liantluanga Chohte chuan, lui hnar lam ngaih pawimawh a ṭul thu a sawi a, "Nikum March ni 7 khan Tlawng luiah tui litre maktaduai 121 a luan laiin, kumin March ni 6-ah khan tui luang hi litre maktaduai 58-ah a tla hniam a, tun thla ni 5 khan litre maktaduai 53-ah a tlahniam leh," a ti a, Tlawng lui hi lui tê hrang hrangin a chawm a nih avangin Tlawng lui a kám a nih chuan lui tê hrang hrangte a kám tihna a nih thu a sawi.

PHE EE chuan, Khawzawl khawpui tui tlan Tuichang lui pawh a chawmtu leh lui hnar, lui tê zawkte ven a pawimawh thu a sawi a, "Kuminah hian National Highway kawng laih vangin Tuichang hnarah leivung a tam em em a, furpui a lo thlen hunah tui a nu dawn. Hmanni lawka ruah tlem a sur pawh khan tu a nu em em a, tih fim hleih theih loh khawp a ni nghal. Furpui thleng tak tak phei se chuan treatment plant in tui nu lutuk tehnaah 1000 a chuang a nih chuan a tifim hlei thei dawn lo," a ti a, tui hna a lo ṭhat leh theih nan thingphun hun a lo thlen hunah thing pakhat tal phun nun tum turin kalkhawmte a chah.

Hnatlangah hian mi 150 vel an thawk chhuak a ni.