BJP zia a lang chho ṭan - Lal Thanzara

Mamit East Block Congress Committee chuan May 6, Inrinni khan Rawpuichhup com­munity hall-ah con­fe­rence an hmang a, an hun hmanpuitu MPCC vice president Lal Thanzara chuan BJP zia a lang chhang chho ṭan mek niin a sawi.

Lal Thanzara chuan, Manipur-ah chuan BJP sorkarna hnuaiah chi leh chi intihbuaina a thleng mek tih sawiin, "BJP zia a lang chho ṭan mek. Kan Pathian biak-in min halsak duhtute hi an tluang chuangin ka ring lo. Hetiang buainaah hian Mizote kan inpumkhat a, kan inthurual a ngai a ni. Burma, Manipur, Bangladesh leh Tripura-te hi political boundary-in min ṭhen hrang mah se, Zofate thinlung hi hmun khat a ni. Ram hrang hrangah ṭhendarh ni mah ila, engtik niah emaw chuan Zofate hi rorelna pakhat hnuaiah kan la awm ngei ka beisei a ni," a ti.

India ramin zalenna a neih theih nan Kristian pachal AO. Hume chuan Indian National Congress a din tih sawiin MPCC Vice President chuam " MNF avangin kum 20 chhung rambuaiah awmin mipui kan rethei em em. Zoram mipuiin kan mamawh ber chu remna leh muanna a ni," a ti a, Congress party chuan remna leh muan­na a awm theih nan an sorkarna chu MNF kutah hlanin Mizoramin remna leh muanna kan neih phah thu a sawi.

Lal Thanzara chuan Congress party-in an in­tiam­na an tihlawhtling lo ngai lo tih sawiin, "Zoram mipuite hnenah remna leh muanna kan tiam a, kan sorkar hnuah remna leh muanna a awm theih nan lalṭhutthleng kan kalsan ngam. Rangva kan sem ang kan tih lai khan mi tam takin Congress an diriam, nimahsela, rangva chu kan sem leh mai. NLUP kan sem ang kan ti a, kan sem leh mai," a ti.