A mala kan sorkar ngei kan ring - Robert Romawia

Chakma Autonomous District Council (CADC) inthlan May 9, 2023 a neih turah MNF adviser Robert Romawia Royte, minister of state chuan a mala an sorkar ngei a rin thu a sawi.

CADC inthlan tur atana campaign-a zin Robert Romawia chuan, MNF chuan candidate ṭha tak tak neiin, an boruak a sang zel niin a sawi a, "CADC-ah hian sorkar ngelnghet din tumin MNF party leh MNF candidate-te pawhin MDC bial 20-ah theihtawp kan chhuah a, mipui zârah a mala kan sorkar ngei kan ring," a ti.

MNF Adviser chuan sorkar ṭha thiltithei leh ngelnghet din tûrin MNF party chu a in pei tawh tih sawiin, "Pu Zoramthanga kaihhruai MNF sorkarin hmasâwnna a ruahman chuan ram pum a huapzo a, hnam tin a huam," a ti a, hmasâwnna lian tham MNF sorkarin a chhawp chhuah dawn thu a sawi.

Robert Romawia chuan opposition party-ten SEDP sum sem thei lo tûrin an duh nia sawiin, "Kan sem thei loh an ring a, Pathian zârah chhungkaw sing 6 in first leh second installment Rs. 25,000 ve ve an dawng tawh. Tunah hian heng chhungkuate tho hian 3rd instalment tur cheng 25,000 an dawng leh dawn a, instalment dangin a zui zel ang," a ti.