MP C Lalrosanga'n Manipur buaina tuartute thiar chhuah leh enkawl dan tur a sawipui

Lok Sabha MP C Lalrosanga chuan May 6, Inrinni khan Manipur tualchhung buaina chungchangah Union Minister of State leh Churachandpur MLA-te a bia a, buaina tuartute hmun him lama thiar chhuah leh enkawl dan tur a sawipui.

C Lalrosanga hian Inner Manipur bialtu Union Minister of State for External Affairs & Education Dr Ranjan Rajkumar Singh leh Outer Manipur bialtu Dr Lorho Pfoze-te nena an inbiaknaah, Manipur aṭanga state dang mi leh sa thiar chhuah dante a sawipui a; a bik takin Imphal-a CRPF camp-a sahimna zawnga tlan lutte ei leh in pek ṭhat a ṭul thu sawiin, Churachandpur lama kal duhte tana venhimna leh lirtheite ngaihtuahsak turin a ngen. Manipur MP-te chuan theihtawp an chhuah zel tur thu Mizoram MP chu an lo hrilh.

C Lalrosanga hian Churachandpur bialtu MLA Paolienlal Haokip pawh biain, hmalak zel dan tur sawidun tura Aizawla inhmuh an tum. Lok Sabha MP hian Manipur aṭanga Mizoram lama haw duhte tana thlawhtheihna leh lirtheia kalna ruahman chungchang pawh chief minister Zoramthanga a sawipui bawk.

Manipur buaina chungchangah hian MP C Lalrosanga hian Union Home Minister leh Union Home Secretary office-a bepawp ve reng bawk niin sorkar thuchhuah chuan a tarlang a ni.