Mahni phâk tâwk ṭheuha intodelh tura hmalak a ṭul - K Lalrinliana

Minister K Lalrinliana chuan May 5, 2023 zan khan a bial chhung Kolasib College Vengah YMA Hall sak thar a hawng. Minister chuan, mahni phâk tâwk ṭheuhah intodelh tura hmalak a ṭul thu a sawi.

K Lalrinliana chuan intodelhna chuan ram leh hnam zahawmna a siam ṭhin tih a sawi a, "Mahni phâk tâwk ṭheuha intodelh tura hmalak a ṭul. Zirlaite'n thiamna chhawrtlak neiin, taimakna leh tumruhna nen kan ram hi kawng engemaw tala intodelha siam turin ruahmanna an neih a pawimawh. Kan ram leilung hausakna haichhuahna kawngahte, a humhalh kawngah leh chenna nuama siam tura hmalakna kawngahte ṭan lak tlân a ṭul hle," a ti.

Sub-Hqrs YMA, Kolasib president Thomas D Lalengliana pawhin thu sawiin, ram hrang hranga awm Zo hnahthlakte inkarah inunauna leh inlungrualna ṭha a awm a pawimawh thu a sawi a, "Kolasib district mipuite pawh Zo hnahthlak unaute buaina leh harsatna hrang hrang avanga thlamuanna zawnga rawn tlân lut an awm a nih pawhin inhawng taka lo dawnsawn thiam a pawimawh," a ti.

College Veng YMA secretary R Lalhmunsiama tarlan danin, College Veng YMA Hall sakna hmun hi Lok Sapha MP hlui Vanlalzawma hmalakpuinaa lei a ni a, hall hmun lei belh nan leh a sak chhunzawm nan chhungkaw tin aṭangin hmanrua leh remchan dan angin sum thawh ṭhin a nih bakah, MLA fund Rs 10,00,000 hmuh a ni.

Hall sak bulṭanna tur hian bialtu MLA hlui PC Zoramsangliana kaltlangin MLA fund leh ṭanpuina Rs 25,00,000 an hmu.