Zo hnahthlak raltlante tana sorkar chêt dan tur sawiho

Home minister Lalchamliana kaihhruaiin May 6, Inrinni khan sorkar hotute'n Manipur tualchhung buaina avanga Mizorama sahimna zawnga tlanchhia Zo hnahthlakte tana Mizoram sorkar hmalak dan tur an sawiho a; raltlante hnar loa aṭul anga ruahmanna lo siampui an rêl.

Lalchamliana chuan, Manipur-a Zo hnahthlakte'n harsatna nasa tak tawk a, nunna chân an awm chu pawi a tih thu a sawi a, "Manipur-a thil thleng hi Mizoram sorkarin uluk takin a ngaihven reng a, Mizoram mi leh sa leh Zo hnahthlakte an sahimna turin theihtawpa hma lain kawng a dap mek a ni," a ti.

Manipur-a cheng Mizote tan a duhawm lo zawnga nghawng a neih loh nan tharum thawhna lam hawi zawnga che lo turin Home Minister chuan Mizorama cheng Mizo mipuite a ngen bawk.

Ṭhutkhawmah hian Mizoram sorkar hmalakna turte an sawiho a; Mizoram mi, Manipur-a la tangkhang, Mizorama haw duhte a theih ang anga thlawhtheihna ticket ngaihtuah sak te, Manipur aṭanga raltlana lo kalte hnar loa a ṭul anga ruahmanna lo siampui te, mamawh huna rokhawlhna a awm loh nan Ngopa, Saitual leh a khaw chhehvelah petrol leh diesel-te stock ṭhat te, a ṭul hun atan relief camp tur ruahmanna siam tura sub-committee dinte an rêl.

He hunah hian Home secretary H Lalengmawia, Health & Family Welfare secretary Esther Lalruatkimi, Disaster Management & Rehabilitation secretary K Lalrinzuali, Mizoram Police hotute bakah mi pawimawh dangte an tel.