Manipur aṭangin an sahimna zawnga Mizorama rawn lut an pun belh zel

Manipur buaina avangin Zo hnahthlak ṭhahnem tak Mizoramah an rawn tlanchhe tawh a, rawn tlanchhiat tum pawh mi eng emaw zat an la awm nia thudawn a ni.

Ngopa RD Block huam chhungah chuan raltlan mi 682 an awm tawh a, ṭhenkhat chu Ngopa tlangdung khuaahte an chawlh hnuah Aizawl lama an chhungte bel turin an tlang leh a ni. Raltlante hi khawtlang mipuiin an ei leh in tur an ngaihtuah sak a, hall leh hmun remchang dangahte riahtir an ni. Ṭhenkhat erawh chuan an chhungte an bel thung.

Ngopa RD Block huam chhunga raltlan awm dan chu Ngopa-ah 77, NE Khawdungseiah 280, Khaw­kawnah 101, Mim­bungah 139, Teikhangah 2, Kawlbemah 51 leh Changzawlah 32 an awm.

Kolasib district-ah pawh Manipur aṭangin raltlan mi 750 chuang an awm tawh. Nimin khan Kolasib DC John LT Sanga kaihhruaiin DRDO conference hall-ah sorkar hotu te, khawtlang leh pawl hrang hrang aiawhte'n Manipur aṭanga raltlante dawn­sawn leh chhawmdawlna pek dan tur an sawiho.

Ṭhutkhawmah hian Kolasib district-ah Manipur aṭanga raltlan mi 750 chuang chhinchhiah an nih tawh thu leh Saipum, Saiphai, Pang­balkawn, Phainuam, Vai­rengte leh Rengtekawn khua­ahte raltlan hi an ṭhahnem zual tih tarlan a ni.

Meeting-a tarlan a nih danin, raltlan zingah chhungte leh hmelhriat belh tur nei an awm laiin, community hall-a riah tir chhungkaw ṭhahnem tak an awm a, khaw ṭhenkhat chuan relief camp sak an tum.

Raltlan thlenkhawmna hmun­ahte inkaihhruaina mumal taka kalpui a pawimawh thu an sawi a; raltlante eitur leh mamawh hrang hrang chu a rang lama ngaihtuah turin VC President-te kaihhruaina hnuaiah Village Level Refugee Relief Committee din lailawk ni se, Branch YMA President-te chu vice chairman ni se, an ti.

Kolasib district khaw hrang hranga Manipur aṭanga raltlante mamawh zualpui phuhruk nan Sub Headquarters YMA, Kolasib kaltlangin khaw tinah vehbur khawn tum a nih thu tarlan a ni a, raltlante tana ṭanpuina pe duh tan DC Office kaltlanga pek dan tur ruahman ni se, an ti bawk.

Manipur buaina avanga Mizoram mi leh sa, Guwahati aṭanga Aizawl lam pan mi 34-te chu nimin zing khan DC Circuit House-ah bialtu MLA K Lalrinliana leh bawrhsap John LT Sangate'n tukṭhuan an buatsaih a ni.