Lung zaisakte a hlawhtling

Corporate social responsibility (CSR) kaltlanga nikum November thlaa Lungleia lung lam leh cancer natna a thlawna inentirna ‘Free Cardiology & Oncology Health Camp’ kaltlanga Shri Ramachandra Medical Centre, Chennai-ah a thlawna lung zai sak mi 10 chu Mizoram an lo thleng kim a; mipa leh hmeichhia panga ve ve niin, thla riat aṭanga kum 54 inkar an ni.

Damlo zai ngaite hi anmahni hruaitute nen April 6, 2023 khan Chennai-a Shri Ramachandra Medical Centre-ah an thleng a, admit nghal an ni. Damlote hi hlawhtling taka zai niin, an zinga mi pakua chu April thla vêk khan Mizoramah an lo haw leh nghal a, an zinga pakhat chu May 7, Pathianni khan a lo haw a ni.

CSR kaltlanga Free Clinic hi Lunglei bawrhsap hmasa Kulothungan A hmalaknaa nikuma neih a ni a; damlote inzaina, damdawi-ina an awm man leh an kal leh hawna senso zawng zawng hi a thlawn veka tih sak niin, ni 90 chhung ei tur damdawi an dawng vek bawk.