Congress MLA-ten Zo hnahthlakte puihna atan Central YMA hnenah cheng nuai 1 an hlan; Kan tih theih tawkah tlanchhiat kan tum lo - CLP
Congress Legislature Party (CLP) te chuan nimin khan an leader Zodintluanga Ralte hoin Manipur buaina avanga Zo hnahthlak harsatna tawkte ṭanpuina atan Central YMA hnenah cheng nuai 1 an hlan.
CLP hian thuchhuah siamin, Manipur lama Zo hnahthlak harsatna nasa tak tawk mêkte an hriat reng thu tarlangin, "Buaina leh harsatnain kian san vat se kan duh tak zet. An tana sorkar leh tlawmngai pawl hrang hrang hmalaknate kan thlawp tlat a ni," an ti.
Manipur buaina chu tumahin politics-a hamṭhat lakna atan hmang lo se an duh thu tarlangin CLP chuan, "Sorkarin min mamawh phawt chuan keini chuan kan tih ve theih tawkah tlanchhiat kan tum lo," an ti a, an tih theih a tlem emaw, a tam emaw pawh ni se, Zo hnahthlakte tan hian an inhawng reng a ni tih sorkar pawhin hriatsak se an duh thu an tarlang.
CLP chuan hnam thil a nih ang ngeiin sorkar hian all party meeting emaw, session te koin, hmalak dan tur relho ni se hmalakna a chak lehzual an beisei thu an tarlang bawk.
An duh loh thil a thleng tih tarlangin CLP chuan, "A thleng ta sa sa he thil thleng hian kan inunauna tichakin, Zo hnahthlakte inhmangaihna tizualtu ni mawlh rawh se tih hi kan duhthusam a ni," an ti.
CLP chuan Zo hnahthlak unau rawn raltlan mekte chu Zofate Jerusalem-ah an rawn thleng tih hriaa inthlahrung lo tura chahin, "Manipur lama kan unau la awm mekte pawhin in unaute kan awm tih hre reng ang che u," an ti a, harsatna hmang hian Zofate inpumkhat lehzual an ringin, an beisei tlat thu an tarlang a ni.