Larsapin sipai bángte tana sorkar hna 5% hauh a taka hman si loh a ngai pawimawh

Governor Dr Hari Babu Kambhampati leh Mizoram Ex-Services League (MESL) hruaitu tharte chu nimin khan Raj Bhavan-ah an inkawm. Larsap chuan, Mizoram sorkar hnuaia Group B, C & D hnaa sipai bang (ex-servicemen)-te tana 5% reservation siam, a taka hman ni si loh chu a ngaih pawimawh thu a sawi.

Sipai bang pawl hruaitute chuan Larsap hnenah hian Mizoram state sorkar hnuaia hnaruak hnawhkhah tur zinga Group B, C & D-a sipai bangte tana 5% reservation chungchang te, Aizawl Khatla leh Champhaia CSD Canteen Extension siam a ṭul thu te, Ex-Servicemen Contributory Health Scheme hnuaia Ṭhuampui Polyclinic tih changtlun dan tur te, Polyclinic-a thawk tur officer leh staff atana khawtual mi ruat a pawimawh chhan leh Treasury Square-a HQ MESL office tihchangtlun dan turte an sawipui.

Larsap chuan, MESL hruaitute thu thlen zinga Mizoram sorkar hnuaia hna Group B, C & D-a sipai bangte tana 5% reservation siam, a taka hman ni si loh chu a ngaih pawimawh thu leh theihtawpa hmalakpui a tum thu a sawi a; an mamawh an thlen dangte pawh lo enfiah a, a theih anga hmalakpui a tum thu a lo hrilh a ni.

MESL hruaitute tarlan danin, Mizoramah sipai bang 5,724, sipai thihsan hmethai 2,500 chuang, ex-servicemen leh an chhungkaw member-te'n hamṭhatna an dawn ṭhin dawng thei mi 24,000 vel leh sipai ṭang lai mi 3,000 chuang an awm mek bawk.

Inkawmnaah hian MESL president Lt Col Clement Lalhmingthanga, vice president Wg Cdr HL Risanga leh Hony Sub Major R Lalthupuia, general secretary Sergeant Dr Ronald Lalnunmawia Royte, treasurer Sergeant C Laldingkima leh fin. secretary Petty Officer C Lalsiamkimate an tel.