KHAWTHLIR

Remna Ni

State Level Committee for Celebration of Remna Ní chu an chairman Dr Renu Sharma, chief secretary kaihhruaiin nimin khan Secretariat conference hall-ah an ṭhukhawm a, kumin June 30-a Remna Ni vawi 37-na hman dan tur an sawiho. Aizawla Remna Ni hman dan tur chu GAD ten ruahman se, district-ah chuan district level committee siamin DC-te kaihhruaina hnuaiah Remna Ni hman dan tur duan ni se, an ti.

Leitlangpui Rahbi

Lunglei High Powered Committee chief planning officer C Vanlalmuana chuan nimin khan Leitlangpui Rahbi 2022-23 buatsaih turah hriattirna a tichhuak a; Lunglei district mite tan tel theih a nih thu leh lawmman dawngtute hnenah ṭanpuina Rs 2,00,000 thleng pek theih a nih thu a tarlang.

Kuhva rah leh meizial man

Champhai Police leh 42nd Assam Rifles ṭangkawp chuan May 6, 2023 zan khan Ruantlang khaw daiah lirthei pakhat (709 truck) aṭangin kuhva ro ip 20 (kg 1800) leh ramdang meizial bawm 184 an man a; lirthei khalhtu C Lalrintluanga (33), Ruantlang, Champhai district nia inchhal an man nghal. Meizial man chungchangah hian Champhai PS-ah COTPA Act hnuaiah thubuai ziahluh niin, kuhva rah mante hi Custom Preventive Force, Champhai hnenah dan anga hmalak zui turin hlan a ni.

Tangkhangte tan ruahmanna siam

Manipur-a Mizoram mi leh sa tangkhangte tan Mizoram sorkar chuan Mizorama an lo haw dan tur ruahmanna a siam a; nimin khan Indigo, Air Asia leh Air India thlawhtheihna hmangin mi 37-in Imphal chhuahsanin Guwahati an pan. Vawiinah Indigo, Air Asia leh Air India thlawhtheihna hmang vêkin mi 28-in Imphal chhuahsanin Guwahati an pan leh bawk ang.

Terrace siamsak

Sialsir Mualkawi zau, Serchhip district-ah FOCUS Project hmalaknain Integrated Farming System (IFS) hnuaiah chhungkaw 40 tan huan nghet neia ei an zawnna tur terrace siam a ni.