Manipur leh Mizoram ramria khuate thawm ṭhat dan tur sawiho a ni

Health & Family Welfare minister Dr R Lalthangliana hoin nimn khan a pisaah Indian Medical Association, Mizoram Government Doctors Association leh Non-Government Hospital Association of Mizoram hotute an inkawm a; Manipur leh Mizoram ramria khua awmte thawmṭhat leh mamawh chakkhai lam kawngah harsatna an tawh loh nana hmalak dan turte an sawiho.

Manipur leh Mizoram ramria khaw hrang hrangah hian Manipur aṭangin raltlan mi eng emaw zat an lo lut tawh a, an la rawn luh belh mek zel a ni. Hriat theih chinah Ngopa leh a chhehvelah raltlan mi 682 an awm tawh.Ṭhenkhat chuan Aizawl lama an chhungte an bel thung.

Inkawmhonaah hian Manipur aṭanga Mizoram mi leh sa hruai haw chungchang te, a ṭul anga chhawmdawl hnathawh dan tur te, Mizorama Meitei lehkha zir leh hnathawka awmte himna tur te, Manipur leh Mizoram ramria khua awmte thawmṭhat leh mamawh chakkhai lam kawngah harsatna an tawh loh nana hmalak dan turte an rêl.

Dr R Lalthangliana chuan, Manipur tualchhung buaina avanga Mizorama sahimna zawnga rawn tlante chu kawng engkimah chhawmdawl zel an nih tur thu a sawi a, "Mizoram doctor-ten Churachandpur Civil Hospital ṭanpuina tura Rs 7,00,000 chuang in thawhkhawm hi a ropuiin a entawntlak hle a, tangkhang leh hliamte ngaihsak leh ngaih pawimawhna lantir zel a ni hi a lawmawm," a ti.

Churachandpur Medical Superintendent leh doctor dangte nen an inbiak thu sawiin Minister chuan, "Tun dinhmunah harsatna an tâwk lem lo tih min hrilh," a ti a, Mizoram aṭanga damdawi thawn a ni chu an lawmthu a sawi.

Dr R Lalthangliana chuan Manipur Addl. Chief Secretary nen an inbiaknaah boruak muanawm a awm vat theih nan theihtawp chhuaha ṭan tlân a ṭul thu an sawidun tih a sawi a; Manipur-a Mizo zirlai naupang leh hnathawka awmte chu Mizorama hruai haw mek niin, rei loteah hruai haw kim thuai an nih tur thu a sawi bawk.