Mizoram leh Zo hnahthlakte himna thuah MNF a tlanchhe ngai lo - MNF Adviser

MNF chuan nimin khan an pisa-ah chhung inkhawm an hmang a, he huna thusawitu MNF adviser J Malsawmzuala chuan Mizoram himna leh Zo hnahthlakte himna thuah MNF an tlanchhe ngai lo niin a sawi.

J Malsawmzuala chuan, MNF chuan Zofate thlavang huai takin a hauh ngam zel nia sawiin, "Congress hunlai March 2018-a zirlaite thlavang hauh ngam loa, kut tawrhtir ang chi kha MNF sorkar kalphung a ni ve lo. MNF sorkar hnuaiah chuan July 26, 2021-ah khan kan police-ten silai hmetpuakin, huaisen takin kan ram himna turin sorkarin hma a la a nih kha. Pu Zoramthanga kaihhruai sorkar hi chuan kan ram, kan hnam leh kan sakhua himna turin huaisen takin, dinna nghet tak a nei a ni," a ti.

Manipur buaina thleng mekah, sorkarin a tih tur dik tak a hun takah a ti zel nia sawiin MNF Adviser chuan, "Mizoram mi leh sa, Manipur-a tangkhang zawng zawngte sorkarin a ngaihven reng a, a hruai haw zel dawn a ni. Zo hnahthlak raltlante tan pawh ruahmanna siamin, VC/LC te hriattirna a pe chhuak vek tawh," a ti a, sorkarin amah maia thuthlukna siam loin, NGO, kohhran leh zirlai pawlte nen thawhho a nih thu a sawi.